"Qarabağ" bu gün doğma meydanda növbəti avrokubok matçını keçirəcək. Rəqib Belçika "Gent"idi. Qış fasiləsindən heyətində dəyişikliklər olan, əsas qapıçısı Şahruddin Məhəmmədəliyevi zədə səbəbindən itirən təmsilçimizi çox ağır oyun gözləyir.

"Football-plus.az" saytı olaraq "köhlən atlar"ın bu qarşılaşmada şanslarını dəyərləndirmək üçün Aslan Kərimova müraciət etdik. Təcrübəli mütəxəssis bunları söylədi:

"Ümumilikdə bugünkü oyunla bağlı fikirlərim pozitivdi. Amma "Qarabağ"ın itkilərini də nəzərə almalıyıq. Komandanın əsas fiqurlarından Kadi ilə Ovusunun olmaması təsirsiz ötüşməyəcək. Şahruddinin yoxluğunu da nəzərə alsaq, hazırda Qurban müəllimi ən çox düşündürən, narahat edən qapı xəttidi. Mövsüm ərzində Luka Quqeşaşvili Ağdam təmsilçisinin heyətində ən çox oyun keçirsə də, çoxlu səhvlərlə yadda qaldı. Mən də çoxları kimi düşünürəm ki, qolkiperin transferi uğursuz oldu. Ona görə də Qurban müəllim son 3 çempionat oyununda Amin Ramazanova şans verdi. Görünür, gənc qapıçını "Gent"lə matça hazırlayır. "Sabah"la son oyunda buraxdığı heyətə Belçika təmsilçisiylə qarşılaşmada güvənəcəyini düşünürəm. Yeni transferlər hələ komandaya tam uyğunlaşmadığından onlardan çox şey gözləmək olmaz. Amma istənilən halda, güvənmək lazımdı. "Gent"ə gəlincə, komanda arxa xəttə daha çox diqqət ayırır. Elə oyunlar var ki, 5 müdafiəçiylə mübarizə aparıb. Bugünkü matçda da "Gent"in müdafiəyə qapanacağı qənaətindəyəm. “Qarabağ” yaradıcı oyunu, qitəmiqyaslı turnirlərdəki təcrübəsi ilə rəqibindən üstün görünür. Qurban Qurbanovun komandasının oyun üslubunu hamımız görmüşük. Qapanan komandalara qarşı təzyiq etməyi sevirlər. İnanıram ki, 2 oyunun nəticəsinə görə mərhələni keçəcəyik. "Qarabağ"a uğurlar arzulayıram".

ABDULLA İSMAYILOĞLU