“Mən yalnız “Qarabağ” azarkeşiyəm. Çalışmışam burdakı bütün oyunlarında komandamıza dəstək olum. Hamı mənimlə əlaqə qururdu. Soruşurdu ki, oyuna bileti necə alaq? Nəhayət, srağagün öyrənmişəm ki, oyun günü stadionda satış olacaq. Qiymət də 32 avrodu. O qədər də baha deyil. Söhbət puldan da getmir. Mənə maraqlıdı ki, insanlarımızın vaxtında informasiyası olsun. Sağ olsunlar, “Qarabağ” nümayəndələri bizi məlumatlandırdılar. Burda yaşayan türklər də var. Onların hamısı görüşə azarkeş kimi gəlmək istəyirdi. Elə bilirdilər ki, “Qarabağ” biletləri pulsuz paylayır. Amma onlara dedik ki, özümüz də pulla alırıq. Onlar da matça gələcəklər. Görüşüb stadiona birgə gedəcəyik. Arenada Türkiyədəki zəlzələ ilə bağlı pankart açmaq istəyirik. Adətən, belə şeylərlə çox məşğul olmuram. Dostumuz Şamil Mustafayev bu işləri özü həll edirdi. İndi o, bir az uzaqdadı. Həm də Belçika olduğuna görə özüm azərbaycanlılara kömək edirəm. Başqa ölkələrdən - Niderland, İsveç və Almaniyadan gələnlər də olacaq. Sizə bir sirr açmaq istəyirəm. Mən Gentdə yaşamıram. Amma həftədə bir dəfə klubun bazasına gedirəm. İşlədiyim şirkət onları idman ayaqqabıları ilə təmin edir. Klub nümayəndələri ilə müntəzəm söhbət edirəm. İki gün öncə getmişdim. Futbolçulara dedim ki, 4-cü qələbəni qazanmağa gəlirik. Onlar da güldülər. “Gent” oyuna soyuqqanlı yanaşır. Azarkeşləri də müaliyimdi, xuliqan deyillər. Məsələn, mən Antverpen şəhərində yaşayıram. Ordakı fanatlar kimi çılğın deyillər. Ümid edirəm ki, hər şey komandamızın xeyrinə olacaq. Əsas odu ki, Lüksemburqda baş verən hadisələr yaşanmasın. “Düdelanj”la matçda ermənilər aləmi qatmışdı. Onlar qondarma bayraqlarını dronla qaldırmışdılar. Həmin vaxt arenaya birinci mən daxil olmuşdum. Belə etməklə oyunu saxlatdırmışdım. Əsas odu ki, belə hadisələr təkrarlanmasın. Ümid edirəm ki, komandamız bu görüşdə qələbə qazanaraq bizi sevindirməyə davam edəcək”.

“Əslən bakılıyam. 1999-cu ildən Belçikada yaşayıram. Avropada loqistika üzrə təhsil almışam. 2005-ci ildən özəl sektorda ticarətlə məşğulam. Həmçinin diaspor işlərində fəalam. “Belçikadakı azərbaycanlılar” adlı təşkilatımız var. Məqsəd ölkəmizi, dövlətimizi, tariximizi yüksək səviyyədə Avropada təmsil etməkdi. Təbii ki, idmanın da burda önəmi var. Futboldan gözəl reklam ola bilməz. “Qarabağ”ın Avropaya səfəri həmişə bizim üçün fəxrdi. Çünki klub Qarabağın adını daşıyır. Müharibədən öncə çətin anlarımız oldu. Azərbaycan millisi Belçikaya gəlmişdi. “Qarabağ” Lüksemburqda “Dudelanj”la qarşılaşdı. Həmin oyunlarda çətinlik yaşamışdıq. Amma indi harda oyun olursa, anlımız açıq gedirik. Düşmənlərimiz müharibədən sonra “Qarabağ”ın qələbələrini görərək məhv olurlar. Gələk təşkilati işlərə. İlkin Hüseynzadə adlı dostumuz bütün işləri, demək olar ki, görür. Biz də 5-6 nəfər bir iş həyata keçirmək istəyirik. Təşkilatımızın üzvləri və övladları birgə oyunu izləyəcəyik. Futbolla bağlı sosial şəbəkə hesablarımızda paylaşım etmişik. Təşkilatımızla birgə oyunu izləmək istəyənlər sıralarımıza qoşula bilərlər. Biz könüllülərik. Burda ürəyi ölkəsi ilə döyünən insanlar təmsil olunur. Əlbəttə, Diasporla İş üzrə Dövlət Komitəsinin nəzdindəyik. Onların da dəstəyini həmişə hiss edirik. Amma yenə təkrar edim ki, bu işi könüllü həyata keçiririk. Uşaqlıqdan futbola sevgim var. Xaricə köçəndən sonra Azərbaycan komandalarının oyunları daha çox diqqətimi çəkməyə başladı. Demək olar ki, uşaqlıqdan “Qarabağ” azarkeşiyəm. Bir-iki oyun istisna olmaqla Avropadakı bütün matçlarını izləmişəm. Bundan sonra da çalışacam ki, komandama əlimdən gələn qədər dəstək olum”.