Sumqayıtdakı Mehdi Hüseynzadə adına şəhər stadionunda yenidənqurma işləri bitmək üzrədi.

Artıq təbii örtüyün altında torpaqbərkitmə işləri aparılıb, xüsusi isitmə və drenaj sistemi quraşdırılıb. Paltardəyişmə, konfrans salonu, dopinq-nəzarət və başqa köməkçi otaqlar da hazırdı. Tribunalarda oturacaqların quraşdırılrması bitmək üzrədi. Xarici fasad hissələrində metal-konstruksiya, ətrafda üfüqi planlaşdırma, həmçinin ağacların budanması işləri həyata keçirilib. Arenanın ətrafına da yeni asfalt döşənir.

Xadırladaq ki, ölkə başçısı 2019-cu ilin noyabrında Mehdi Hüseynzadə adına Sumqayıt şəhər stadionunun yenidən qurulması məqsədilə sərəncam imzalamışdı. Və bunun üçün dövlət büdcəsindən ilkin olaraq 5 milyon manat ayrılmışdı.

Yuxarıda qeyd etdiyimiz kimi, arenada işlər, demək olar, yekunlaşmaq üzrədi. Bəs görəsən, yenilənmiş “Mehdi Hüseynzadə”nin açılışı nə vaxta olacaq? Bu suala aydınlıq gətirmək üçün arenanın direktoru Nadir Quliyevi aradıq: “Böyükhəcmli işlər yekunlaşıb. Ancaq xırda işlər qalıb ki, onlar başa çatdırılmalıdı. İş rejimində heç bir problem yoxdu. İşçi qüvvəsi də öz yerində. Sadəcə, qeyd etdiyim kimi, bəzi xırda işlər yekunlaşmalıdı ki, stadionun açılışını edək. Böyük ehtimalla arenanın açılışı dekabrın əvvəlinə təsadüf edəcək. Bu ayın 27-28-də əlaqə saxlasaz, sizə daha dəqiq tarix söyləyə bilərəm”.

RƏŞAD