Çoxları bəyənməsə də, Şahruddin Məhəmmədəliyev “Qarabağ” üçün əsas fiqurlardan biridi.

Bəli, qolkiper vacib oyunlarda səhvlərə yol verir. Amma indiki məqamda Ağdam təmsilçisinə çox kömək ola bilərdi. Təəssüf ki, milli üzvünün Antalyadakı təlim-məşq toplanışında qolu sındı. Onun 2 ay yaşıl meydanlardan uzaq qalacağı bildirildi. Almaniyada əməliyyat olunan Şahruddin hazırda qolunu sağaltmağa çalışır.

28 yaşlı qolkiperlə bağlı xəbərlər yanvarın 16-dan yayılmağa başladı. Düşünək ki, milli üzvü elə həmin vaxtdan zədəlidi. “Qarabağ” “Gent”lə ilk oyununu fevralın 16-da keçirəcək. Cavab matçı isə bir həftə sonra olacaq. Ümid edək və inanaq ki, son Azərbaycan çempionu belçikalıları mübarizədən kənarlaşdıracaq. Bundan sonra necə olacaq? 1/8 finalda “Qarabağ” Şahruddinin xidmətindən yararlana biləcəkmi? Mediada rastımıza çıxan bəzi yazılarda qeyd olunub ki, Şahruddin üçün avrokuboklar mövsümü bitdi. Çünki Ağdam təmsilçisinin UEFA-ya göndərdiyi iştirak ərizəsinə 28 yaşlı qolkiperin adı salınmayıb: qapıçılar - 23. Luka Quqeşaşvili, 89. Amin Ramazanov; müdafiəçilər - 4. Rahil Məmmədov, 5. Maksim Medvedev, 13. Bəhlul Mustafazadə, 29. Marko Veşoviç, 44. Elvin Cəfərquliyev, 55. Bədavi Hüseynov, 81. Kevin Medina; yarımmüdafiəçilər - 2. Qara Qarayev, 6. Julio Romao, 7. Yassin Benzya, 8. Marko Yankoviç, 10. Abdulla Zubir, 15. Leandro Andrade, 18. İsmayıl İbrahimli, 19. Filip Ozobiç, 20. Riçard Almeyda, 87. Adama Diakabi; hücumçular - 77. Ramil Şeydayev, 99. Redon Cica. B heyəti - 94. Ayhan Arazlı, 27. Toral Bayramov, 9. Musa Qurbanlı, 90. Nəriman Axundzadə.
Gördüyünüz kimi, Şahruddinin adı siyahıda yoxdu. Qurban Qurbanov və “Qarabağ” rəhbərliyi “Gent”i keçmək haqda düşünməyib? Qapıçı 1/8 finala kimi sağala bilməz? Yuxarıda qeyd etdiyimiz kimi, onun 2 ay yaşıl meydanlardan uzaq qalması gözlənilir. Dönüşü daha tez də baş verə bilər. Bəs Şahruddinin adı niyə siyahıya salınmayıb? UEFA-nın Konfrans Liqası üçün əsasnaməsində yer alan maddələrini diqqətinizə çatdırırıq:

46.01 – Konfrans Liqasında çıxış edən hansısa klub pley-off mərhələsində yalnız 3 futbolçu sifariş edə bilər. Həmin şəxslər 2 fevral 2023-cü il, saat 00.00-a kimi sifariş olunmalıdı. Son tarixi keçmək olmaz.

46.02 – Bu 3 futbolçu UEFA-nın Avropa səviyyəli 3 turnirində – Çempionlar Liqası, Avropa Liqası və Konfrans Liqasında çıxış edən digər klubların heyətlərində oynamış oyunçular ola bilər.

46,03 – Siyahıda yer alanların sayı 25-i keçirsə, klub kimisə burdan çıxartmalıdı. Bu zaman yerli oyunçu kvotasına əl vurmaq olmaz. Yəni burda azərbaycanlı futbolçulardan ibarət limit pozulmamalıdı.

46,04 - Klub A siyahısında (yəni əsas sifariş vərəqində) olan ən azı 2 qapıçının xidmətindən uzunmüddətli xəstəlik və ya zədə səbəbindən məhrum olarsa, istənilən vaxt yeni qapıçı sifariş verə bilər. Uzunmüddətli zədə ən azı 30 gün və daha çox dövrü əhatə edir. Qapıçının zədəsi 30 gündən az olarsa, oyunçu bu dövr ərzində A siyahısından kənarda qalmalıdı. Əvəz edilen qapıçı yerli statusu daşıyırsa, yeni transfer edilən qapıçı əcnəbi ola bilər. Klub UEFA-ya rəsmi dillərdən birində hazırlanmış sübutlarla oyunçunun zədəli olmasını sübut etməlidi. UEFA araşdırma aparmaq üçün klubun hesabına müstəqil ekspert təyin edə bilər. Zədəli qapıçı sıraya döndükdə onun əvəzinə sifariş olunan qapıçının yerini tutmaqla yarışa qayıda bilər. Yəni siyahida əvəzlənmə, qapıçının həyətə qayıtması, oynaması planlaşdırılan görüşdən 24 saat öncə UEFA-ya bildirilməlidi.

Əsasnamədə sifariş ərizəsi ilə bağlı maddələr belə təsvir olunub. 46.04 bəndinə görə sevinmək olar. Çünki bu, qaydalar Şahruddinin istənilən vaxt geri dönməsinə əsas verir. Bura kimi hər şey xeyrimizədi. Necə? “Qarabağ”ın Avropa Liqasının qrup mərhələsində iştirak etmək üçün UEFA-ya göndərdiyi şifariş ərizəsində Şahruddin Məhəmmədəliyev A siyahısında yer almışdı. Fevralın 2-də göndərilən siyahıdan onun adı zədəli olduğuna görə çıxarılıb, bərpasının 30 və ya daha çox çəkəcəyi göstərilib. Milli üzvünün əvəzinə isə B siyahısına Ayhan Arazlının adı salınıb. Burda iki məqsəd olub: 46.04 bəndinə uyğun olaraq əcnəbi və ya yerli qolkiperin alınması halında “Gent”lə Bakıdakı oyuna 1 gün qalmış Ayhan Arazlının əvəzinə yeni transferin əlavə olunması, yaxud da Şahruddinin tam sağalandan sonra rahat geri dönməsi. İndi məsələni daha da asanlaşdıraq. Tutaq ki, “Qarabağ” “Gent”i keçdi. Konfrans Liqasının növbəti matçları martın 9-da baş tutacaq. Həmin vaxta kimi Şahruddinin yaşıl meydanlardan uzaq qalmaq müddəti başa çatacaq. Çox böyük ehtimalla “Qarabağ”ın həkimləri millinin qolkiperinin o zamana kimi tam sağalacağına ümid edir. Bu baş versə, 1/8 finalın ilk oyunundan 1 gün öncə Ağdam təmsilçisi Şahruddini Ayhan Arazlının əvəzinə siyahıya daxil edə bilər. Yəni “Qarabağ” azarkeşləri rahat ola bilər. “Gent” səddi keçilsə və Şahruddin tam sağalsa, Qurban Qurbanov onun xidmətindən avrokuboklarda rahatca yararlanacaq.