Antalyada “Medz Leqnisa” görüşə Regekampf maraqlı heyət və sistem ilə çıxmışdı.

Brkiç həmişəki kimi qapının toxunulmazlığını təmin etməyə çalışırdı. Müdafiənin solunda Azər, mərkəzdə Solomon, Stankoviç və Höccət, sağda isə İsmayıl çıxış edirdi. Regekampfın 5-li müdafiə sisteminə keçməsi maraqlı məqamlardan biri idi. Rumın mütəxəssis bu dəfə Eminə şans verməmişdi. Bu səbəbdən də yarımmüdafiə xəttində maraqlı gedişlər etmişdi. Azər Əliyev dayaqda, Kenni isə daha öndə çıxış edirdi. Pato solda, Donyo sağda vinger kimi oynayırdı. Hücumun mərkəzində isə gənc Ağadadaş yer almışdı.

Heyət qeyri-adiliyi ilə fərqlənirdi. Əvvəlcə başlayaq 5-li müdafiə sistemindən. Toplanışdan əvvəlki açıqlamaya diqqət yetirsək, rumın mütəxəssis dəyişiklik etməyəcəyini dilə gətirmişdi. Görünür, “Sabah” və “Qarabağ”la oyunlarda bundan istifadə etmək niyyətindədi. Çünki hər iki kollektiv cihanlardan çox rahat hücumlar təşkil edir. Regekampf da bu boşluğu aradan qaldırmaq üçün belə yola əl atıb. Bu sistemi 5-4-1 yox, 3-6-1 kimi də dəyərləndirə bilərik. Çünki Azərlə İsmayıl hücumların qurulmasında tez-tez komandaya kömək edə bilir. Əliyevin mövqeyi isə olduqca maraqlı idi. Yarımmüdafiəçi bəlkə də karyerasında ilk dəfə dayaqda çıxış edirdi. Ola bilər ki, Regekampf azərbaycanlı futbolçunun unikallığından istifadə edərək bura uyğunlaşdırmağa çalışır. Lakin ilk cəhddən görünən o idi ki, fikir yaxşı olsa da, Azər tapşırığı yerinə yetirə bilmir. Kenninin sağ cinah vingerliyindən mərkəzə keçməsi də anlaşılan deyil. Ardıcıl iki matçdı ki, ABŞ-lı futbolçu burda çıxış edir. Görünür, yarımmüdafiə xəttində zədəlilərin çox olması Regekampfı belə gedişlərə məcbur edir ki, heyətdəki boşluğu doldura bilsin. Patonun sol, Donyonun sağ cinah vingeri olması da maraqlı addım idi. Braziliyalı buna alışıb. O, yarımmüdafiənin istənilən cinahında və ikinci hücumçu kimi çıxış edə bilir. Donyo isə Bakı təmsilçisinə forvard kimi gəlib. Görünür, mütəxəssis qanalının çempionat oyunlarındakı “dişsizliyindən” narazıdı. Bu səbəbdən də onu hücumun sağına çəkib. Ağadadaşın yoxlama oyununda start heyətində meydana çıxması isə alqışalayiq addımdı. Belə görüşlərdə ona şans verilməsi daha yaxşı inkişaf etməsinə şərait yaradacaq.

Qarşılaşma haqda çox danışmağa ehtiyac yoxdu. İlk dəqiqələrdən sona kimi “Neftçi” normal oyun sərgiləyə bilmədi. Baxmayaraq ki, hesabı 15-ci dəqiqədə Ağadadaş açdı. Lakin həmin qol da polşalıların səhvindən sonra vuruldu. Bundan sonra “Medz Leqnisa” irəli atıldı.

Regekampfın komandası 5-li müdafiə sistemiylə çıxış etsə də, olduqca ciddi səhvlərə yol verildi. Əsasən cinahlardakı problem aşkar hiss olunurdu. Polşalılar həm sağdan, həm də soldan hücumlar qururaq “Neftçi”ni narahat edirdi.
İkinci hissədə də heç nə dəyişmədi. Burda “Neftçi” adına yeganə müsbət məqam Sezar Meza Kollinin uzun müddətdən sonra yaşıl meydana dönməsi oldu. Oyun isə “Medz Leqnisa”nın xeyrinə başa çatdı. Polşalılar 49-cu dəqiqədə hesabı bərabərləşdirdi. Anxel Xose Henrike İturra baş zərbəsi ilə fərqləndi. 3 dəqiqə sonra isə hücumçu dublunu rəsmiləşdirdi. O, penaltini dəqiq yerinə yetirərək yekun hesabı müəyyənləşdirdi.

Beləliklə, “Neftçi” Antalyada keçirdiyi ikinci matçında məğlub oldu. Görünən odu ki, flaqman toplanışda da bəlli problemlərini həll edə bilməyib. Xüsusilə də müdafiədəki boşluqlar və cinahların zəif olması aşkar hiss olunur. “Ağ-qaralar”ın əsl gücü isə yanvarın 19-da “Srvena Zvezda” ilə oyunda bəlli olacaq.

İLKİN SULTANLI