Misli premyer-liqası qaldığı yerdən davam edir.

Bu gün həftənin ən maraqlı görüşü sayılan “Qarabağ” - “Neftçi” matçı keçiriləcək. “Azərsun Arena”da Azərbaycan derbisi baş tutacaq.

Ağdamlılar çempionatda 1 oyun az keçirdiyi üçün hər iki komanda hazırda 18 xala malikdi. Bu görüş premyer-liqanın axarına təsir edə bilər. İstənilən halda, bu gün tarixi əhəmiyyəti böyük olan, maraqlı, baxımlı qarşılaşma bizi gözləyir. Bəs bu matçda kim favoritdi? Komandaların güclü və zəif tərəfləri hansıdı? Bu yazıda belə məqamlara aydınlıq gətirməyə çalışacağıq.

Bərabərsəviyyəli heyətlər

Gəlin, komandaların avrokuboklarda bu mövsüm meydana çıxdığı matçları nəzərə almayaq. Buna əsasən deyə bilərik ki, hər iki rəqibin heyəti bərabərsəviyyəlidi. Hamıya bəllidi ki, “Qarabağ” premyer-liqa matçlarında avrokuboklarda meydana çıxan heyətdən fərqli “11-liy”ə güvənir. “Neftçi”nin baş məşqçisi Laurentsiu Regekampfın da limitə uyğun güvəndiyi futbolçular bəllidi. Tək problem qapı ilə bağlıdı. Qurban Qurbanov, sözsüz, Şahruddin Məhəmmədəliyevə güvənəcək. Rumıniyalı mütəxəssis isə Aqil Məmmədovla İvan Brkiç arasında seçim etməli olacaq. Keçək müdafiəyə. Ağdamlılar burda bir qədər axsayır. Düzdü, “köhlən atlar”ın müdafiəsinin “onurğa sütunu” sayılan Kevin Medina zədəsini sağaldıb. Kolumbiyalı bu görüşün iştirakçısı ola bilər. Lakin Qurban Qurbanov riskə getməyib, yenə mərkəzdə Bədavi Hüseynov - Bəhlul Mustafazadə duetinə güvənə bilər. 50 yaşlı mütəxəssis müdafiənin solunda Elvin Cəfərquliyev - Toral Bayramov ikilisi arasında seçim etməli olacaq. Sağ cinahda da vəziyyət eynidi. Avrokuboklarda daim meydanda olan Marko Veşoviçin, yoxsa premyer-liqa qarşılaşmalarında şans qazanan Abbas Hüseynovun “Neftçi”yə qarşı oynayacağı sual doğuran məqamdı.

Regekampf isə bu problemi həll edib. Rumıniyalı 7 tur ərzində özü üçün müdafiə “dördlüy”ü müəyyənləşdirib. Solda yeni kəşf Azər Əliyev, mərkəzdə Voislav Stankoviçlə Solomon Kverkveliya, sağda isə İsmayıl Zülfüqarlı mübarizə aparacaq. Regekampf hətta Mamadu Mbocu da burda oynada bilər. Ki, avrokubok görüşlərində bu riskə gedib.

Komandaların yarımmüdafiə xətlərində mübarizə aparan futbolçuların gücləri eynidi. Bunu asanlıqla iddia edə bilərik. “Qarabağ”da Qara Qarayev, Riçard Almeyda, Abdulla Zubir, Filip Ozobiç, Kadi Borges, Leandro Andrade, Marko Yankoviç, Julio Romao kimi futbolçular var. Qurban Qurbanov onlardan ən hazır olanlarını meydana buraxıb, 3 xal əldə etməyə çalışacaq. Regekampın əli də o qədər zəif deyil. Rumın mütəxəssisin sərəncamında Eddi İsrafilov, Emin Mahmudov, Ataa Caber, Kenni Sayef, Rəhman Hacıyev, Yusuf Laval, Vato Arveladze, Gilyerme Pato və Fərid Yusifli kimi oyunçular var.

Hücum xəttində isə “Qarabağ” aşkar üstündü. 7 turda 15 qol vuran Musa Qurbanlı - Ramil Şeydayev - Kvabena Ovusu “üçlüy”ü ilə cəmi 3 dəfə fərqlənən Qodsvey Donyo - Yeqor Boqomolski duetini müqayisə etmək olmaz. Bütün bu amilləri nəzərə alanda heyətlərin ümumi gücünün bərabər olduğunu söyləyə bilərik.

Qurbanov Regekampfa qarşı

Bu məşqçilər karyeralarında ilk dəfə üz-üzə gələcək. Hər iki mütəxəssis olduqca uğurludu. Həm Qurbanovun, həm də Regekampfın böyük avrokubok təcrübəsi var. Azərbaycanlı “Qarabağ”da özünəməxsus sistem formalaşdırıb. 50 yaşlı mütəxəssis 4-5-1 sxemini fərqli rotasiyalarla təkmilləşdirərək yaxşı komanda formalaşdırıb. Rumıniyalı da “Neftçi”də eyni sistemi tətbiq edir. Sadəcə, Regekampf komandanı cəmi 11 rəsmi görüşə çıxarıb. Bu da “Neftçi”nin tam püxtələşməsinə mane olan əsas səbəbdi. Qurban bəyin “Qarabağ”la əldə etdikləri isə hamıya bəllidi. Digər tərəfdən, azərbaycanlı mütəxəssis olduqca nizam-intizamlı şəxsdi. Rumıniyalı isə tez-tez şəxsi həyatındakı qalmaqallarla gündəmə gəlir.

Bunlar standart məsələlərdi. Ən əsas məqam isə baş məşqçilərin oyuna müdaxilələri olacaq. Sözsüz, Qurbanov burda bir addım öndədi. Təcrübəli mütəxəssis meydana çıxardığı “11-liy”i əvəzetmələrlə yeniləyib, hesabı öz xeyrinə dəyişə bilir. “Sabah”la premyer-liqa matçında bunun şahidi olduq. Regekampfın isə belə bir imkanı yoxdu. Rumın mütəxəssis ən vacib görüşlərdə belə əsas heyətə sona kimi güvənir. “Neftçi”nin “Rapid”ə və “Sabah”a uduzduğu matçları buna nümunə göstərə bilərik. Bəlkə də Regekampfın sərəncamında oyunun axırını dəyişə biləcək futbolçuların az olması bunu səciyyələndirən əsas səbəblərdəndi.
Hər halda, oyun sistemi eyni, xasiyyətləri fərqli olan iki məşqçinin duelini izləmək çox maraqlı olacaq. Əlbəttə, bu görüş son illərdə sönük keçən premyer-liqaya maraq qatacaq. Ümid edək ki, bu, qamaqal hesabına yox, baxımlı oyuna görə olacaq.

İLKİN SULTANLI