Hamı DÇ-2022-nin qalibi olan Argentina yığmasında Lionel Messinin dünya çempionu olmasından danışır.

Ya da komandanın Niderland və Fransa ilə oyunlarından sonrakı penalti seriyasında qəhrəmana çevrilən Emiliano Martinesin oyunu qabardılır. Əlbəttə, 36 illik çempionluq həsrətinə son qoyulubsa, deməli, məşqçi və bütün oyunçu heyəti tərifə layiqdi. Futbolçular sırasında Anxel Di Mariya da böyük uğuruna görə xüsusi fərqlənməyə layiqdi.

Faydası olmayan iki ağrıkəsici iynə

Bəli, Messinin milli formada ilk titulunu neçə il gözləməsi haqda çox deyilib və yazılıb. Dünya çemionu olmaq perspektivləri ilə bağlı mülahizələr 2014-cü ildəki finalda Almaniyaya məğlubiyyətdən (0:1) sonra daha da çıxaldı və bu, təbii idi. Onda Argentinaya irəliyə doğru yalnız sonuncu addımı atmaq qalırdı. Ya da komandada bir oyunçuya xüsusi ehtiyac duyulmuşdu. Di Mariya final ərəfəsində zədələnməsinə baxmayaraq, meydana çıxmağa can atmışdı. “Real” rəhbərliyinin qadağasına tüpürməyə də hazır idi. Anxel hətta İspaniya klubundan Argentina yığmasına göndərilən məktubu oxumağı da lazım bilməmişdi. Ona klubundan göstəriş gəldiyini bildirən milli komandanın həkiminə “burda yalnız özüm qərar verirəm” demişdi.
Ancaq Anxel özü və 8 il əvvəlki mərhum baş məşqçi Alexandro Sabelya qarşısında dürüstlüyünü qorumuşdu. Onun final ərəfəsindəki vəziyyəti yalnız özü, həkim Daniel Martines və çalışdırıcıya məlum idi. Futbolçu almanlarla həlledici mübarizəyə tam hazır olmadığını Sabelyaya bildirmiş, həmin anda göz yaşlarını saxlaya bilməmişdi. Məşqçi də böyük məyusluq və təəssüf hissi ilə start heyətində Entso Peresin oynamasına qərar verməli olmuşdu...
Amma Anxel onda səhhəti ilə risk etməyə hazır idi. Hətta bu, onun karyerasını sual altına alsaydı belə meydana çıxmağa can atırdı. Həmin axşam həkimlər ona start fitindən əvvəl və fasilə zamanı iki ağrıkəsici iynə vurmuşdular. Üçüncüyə ehtiyac qalmamışdı, ona görə ki, matçın 30 dəqiqəlik əlavə vaxtının əvvəlində argentinalıların əvəzləmə limiti dolmuşdu. Başqa sözlə, Anxelin fiziki ağrıları mənəvi planda problem də yaratmışdı. Hərçənd bir neçə ildən sonra istənilən halda həmin finalı karyerasının ən yaxşı anı adlandırmışdı...

Bir ildə 2 vacib qol

Təbii ki, bu fikri yalnız komandanın uzun illərdən sonra mundialın finalına çıxmasına görə dilə gətirmişdi. Axı tale həm onun, həm də Messinin üzünə gülmürdü. Nəhayət, “futbol Tanrısı” onları sevindirməyə başladı. Di Mariya isə “albiselesta”ya həlledici məqamlarda titul qazandıran oyunçuya çevrildi. Uğurlar silsiləsi 2021-ci ilin yayında keçirilən Amerika Kubokunun finalından başladı.
Argentina məhz Anxelin vurduğu yeganə qolla Braziliyaya qalib gəldi. Yarımmüdafiəçi “Marakana”dakı matçdan sonra keçirdiyi hislərini belə dilə gətirmişdi: “Bu unudulmazdı. Messi mənə təşəkkür etdi və bu oyunun mənim finalım olduğunu dedi. 2014-cü ildə iştirak edə bilmədiyim həmin finalın əvəzini çıxmış olduq. Bu hadisə indi baş verməli idi və baş verdi də. Bizə dəstək verən ailəmə və hər kəsə, həmçinin final matçına gələn bütün azarkeşlərimizə minnətdaram. Tezliklə dünya çempionatı keçiriləcək və Amerika Kubokundakı qələbə bizim üçün təkan rolunu oynayacaq”.
Və həmin təəssüratı Di Mariyanı aldatmadı. Bu yay Argentina yığması Avropanın son çempionu İtaliya ilə Finalissima adı verilən iki qitənin qalibi arasında keçirilən matçda rəqibinə 3:0 hesabıyla üstün gəldi. İyunun 1-də Londondakı məşhur “Uembli” stadionunda baş tutan oyunda qollardan birini məhz Anxel vurdu. O, matçdan sonra jurnalistlərə açıqlamasında artıq Qətərdəki dünya çempionatına nəzərən fikir səsləndirmişdi: “Hər şey Amerika Kubokundan sonra dəyişdi. Braziliyada uğur qazanmaqla çiyinlərimizdəki ağır yükü bir kənara ata bildik və indi sərgilədiyimiz oyundan daha böyük məmnunluq alır, vaxtımızı daha yaxşı keçiririk. Həqiqətən də indi işlərimiz daha asan alınır”.

Yöndəmsiz ötürmədən dahiyanə finaladək

Amma əlbəttə ki, Qətər sınağı heç də asan olmadı. Bu fikri həm Argentina, həm də şəxsən Di Mariya haqda səsləndirməliyik. O, zədəsini Səudiyyə Ərəbistanı ilə ilk oyundan 3 həftə əvvəl sağaltmışdı. Bilindiyi kimi, “albiselesta” mundiala sensasion məğlubiyyətlə (1:2) başladı. Startdakı uğursuzluqdan dərhal sonra hər şey alt-üst ola bilərdi. Bir neçə gündən sonra Rodriqo De Paul belə başlanğıcın komandada güclü əsəb pozuntusu yaratdığını etiraf etdi. Argentinalılar Meksikayla növbəti oyunda bir saatdan artıq müddətdə “qıfıllanan qapını döyməklə” böyük enerji itirdilər. Sonra Messinin baxımlı zərbəsi milli komandanı uçurumdan xilas etdi. Lionel məhz Di Mariyanın ötürməsiylə hesabı açdı.

Anxel bir müddətdən sonra həmin epizodu belə dəyərləndirdi:

Həmin andan hər şey dəyişdi, ancaq pley-offun startı ərəfəsində Di Mariyanın səhhətiylə bağlı problemləri yenidən baş qaldırdı. O, komandanın Avstraliya üzərində qələbəsini (2:1) ehtiyat oyunçular skamyasından izlədi. Sonra Niderlandla 1/4 final matçının əlavə vaxtının sonuna yaxın meydana çıxdı. Baş məşqçi Lionel Skaloni hər dəfə “Anxelə növbəti oyunda neçə dəqiqə kifayət edəcək” sualı üzərində baş sındırmalı olurdu. Xorvatiya ilə yarımfinaldan əvvəl təxminən 30-45 dəqiqə oynamaq ehtimalı vardı, ancaq Di Mariya əvvəldən axıradək ehtiyat oyunçular skamyasından qalxa bilmədi.
Argentinalı insayderlərin iddiasına görə, Skaloni təcrübəli futbolçunu turnir boyunca bu şəkildə qorumağı lazım bilirdi: onun səhhətiylə riskə getməməyi və şans verdiyi matçlarda çox da yormamağı zəruri sayırdı. Xoşbəxtlikdən final oyununda ilk dəqiqələrdən meydanda idi. Maraq üçün qeyd edək ki, Fransa ilə sınağa hazırlaşanlar arasında yalnız Di Mariya ilə Messi DÇ-2014-ün iştirakçısı olmuşdu. Özü də veteran futbolçular digər oyundaşlarından fərqli olaraq, finaldan əvvəl yaxınlarıyla görüşmək əvəzinə istirahət günü yığmanın düşərgəsində qalaraq əlavə hazırlıq keçmişdilər. Finalın qəhrəmanları məhz onlar oldular, əlbəttə, möhtəşəm Emiliano Martineslə birlikdə!

Messi sona qədər meydanda qaldı. Di Mariyanın beynəlxalq karyerası isə 64-cü dəqiqədə sona çatdı: hesab 2:0 olarkən Skaloni onu əvəzlədi. Anxel bunadək komandasına penalti qazandırmış və ardıcıl 3-cü finalda qol vurmuşdu! Yəqin ki, çox uzun çəkən finalın qalan vaxtında onun ehtiyat oyunçular skamyasında necə narahatlıq keçirdiyini unutmamısız. Sonda fransızların ssenarisi alınsaydı, futbol dünyası yenidən ona və Leoya görə böyük təəssüf hissi keçirəcək, bu oyunun ədalətsiz yönünü vurğulayacaqdı. Yox, amma budəfəki final da argentinalıları sevindirdi. Artıq 4-cü dəfə Di Mariyanın həlledici matçı “albiselesta”ya qələbə gətirdi! Məlumunuz olsun ki, o, Pekində keçirilən Olimpiada-2008-in finalında da Lionelin ötürməsiylə qələbə qolunu vurub! Bir sözlə, Anxel finalların qəhrəmanıdı!

Yeri gəlmişkən…

* Amma Di Mariya artıq dünya çempionatından sonra yığmadan ayrılmaqla bağlı fikrini dəyişib: o, beynəlxalq karyerasını davam etdirmək qərarına gəlib. Halbuki mundialdan əvvəl belə açıqlama vermişdi: “Dünya çempionatından sonra yığmadakı çıxışımı dayandıracağam. Yerimi gənclərə vermək qərarına gəlmişəm. Onlar bir müddətdi beynəlxalq səviyyədə müntəzəm oynayır və təcrübə qazanırlar. Artıq ölkəmizi layiqincə təmsil etməyə qadirdilər”.
Ancaq dünya çempionluğu Anxeli o qədər ilhamlandırıb ki, təxminən ayyarım əvvəl dilə gətirdiyi fikrindən daşınmalı olub. “TyC Sport” nəşrinin yazdığına görə, onun mövqeyini dəyişməsinə həm də yığmada qalmaq qərarını verən Messi səbəbkar olub.
* Di Mariya “Yuventus”u yanvarda tərk edə biləcəyi ilə bağlı ehtimala da son qoyub. Braziliya, BƏƏ və ABŞ klublarının maraq dairəsində olan dünya çempionu azı mövsümün sonuna qədər İtaliyada qalmağı düşünür.
* Onu da əlavə edək ki, Di Mariya DÇ-2022-nin qalibi olması şərəfinə döymə etdirib. Sosial şəbəkələrdə futbolçunun yeni tatusunun fotoları yayılıb. O, sağ ayaq buduna dünya kubokunun şəklini döydürüb.