Lionel Messi, nəhayət, çoxdankı arzuya çatdı.

Argentina yığmasının kapitanı 35 yaşında dünya çempionu oldu. Fransa ilə dramatik finalın ardından meydanda daha bir maraqlı hadisə baş verdi. Onda komandalar mükafatlandırma mərasiminə hazırlaşırdı. Futbolçular, xüsusən də argentinalılar mərasimin həsrətini çəkdiyi anlarda meydana bir qadın qaçdı. Əvvəlcə çoxları onun Messinin anası Seliya Mariya Kuççittini olduğunu güman etdi. Kadrlardan açıq-aydın görünür ki, həmin qadın Leoya hiss olunmadan yaxınlaşıb və qəfil görünməsi ulduzu sözün yaxşı mənasında təəccübləndirir. Şəkildəki emosiyalara baxın!

Qucaqlaşmaya 2-3 saniyə qalmış Messi qadını görməyib. O, argentinalı futbolçulardan birinin arxasında – Leonun 3-4 metrliyində gizlənib. Nəticədə sürpriz baş tutub.

Elə burdaca mətni bitirmək olardı, ancaq bir önəmli məqan var: əksər kütləvi informasiya vasitələrinin yazdığının əksinə, həmin qadın Messinin anası deyil. Əlbəttə, o da stadionda idi və finaldan sonra Leonu qucaqladı. Ancaq Seliyanın əynində Argentina yığmasının mavi-zolaqlı ənənəvi forması yox, tünd göy rəngdə olan səfər geyimi var idi. Üstəlik onun qolunda Messinin qucaqladığı qadın kimi saat və döymə yoxdu.  

Bəs bu sirli qadın kimdi? “Infobae” iddia edir ki, bu, Antonia Fariasdı. O, Argentina yığmasında logistika ilə məşğul olmasa da, vacib şəxs sayılır. Belə ki, Antonia 10 ildi aşpaz işləyir və hər səfərdə futbolçuları müşayiət edir. Qələbə ilə bitən ötənilki Amerika Kubokunda, Finalissimada və DÇ-2022-də nümayəndə heyətinin tərkibində olub. Xanımı hətta yığmanın talismanı adlandırırlar.

Yeri gəlmişkən, Argentina yığmasında iki xanım çalışır. Digər qadın marketinq meneceri Veronika Miledi. Farias işini uğurla yerinə yetirir və futbolçulara rahat şərait yaradır. Onların menyu ilə bağlı heç bir gileyi yoxdu. Qadın müsbət xarakterinə görə çox sevilir, oyunçularla əla münasibət qurur.

Yeri gəlmişkən…
PSJ-nin hücumçusu Lionel Messinin Argentina yığmasının heyətində dünya çempionatının qalibi olması Fransada qısqanclıqla qarşılanmaqdadı. Fransızlar təcrübəli oyunçudan fərqli üsulla qisas almağa qərar verib. Belə ki, bu ölkədə fəaliyyət göstərən barlardan birində döşəməyə Messinin PSJ-dəki forması sərilib. Girişdə isə “içəri girərkən ayaqlarınızı silməyi unutmayın” sözləri yazılıb. Beləcə bara baş çəkən hər kəs ulduz oyunçunun formasını tapdalamaqla içəri daxil olur.

Messi ötən ilin yayından PSJ-də forma geyir, bu komandada 53 oyuna 23 qol vurub, 29 məhsuldar ötürmə verib. 35 yaşlı hücumçunun Paris klubu ilə müqaviləsinin müddəti bu mövsümün sonuna qədərdi.