“Qətərdə hələ ki, heç bir neqativ durum yaşanmayıb”
DÇ fasiləsindən istifadə edərək Antalyaya toplanışa gələn çoxsaylı klublardan biri də “Kristal Pelas”dı.
Football-plus.az xəbər verir ki, dünən burda “Trabzonspor”la qarşılaşan premyer-liqa təmsilçisi dekabrın 11-də isə “Napoli” ilə üz-üzə gələcək. Bu arada London klubunun baş məşqçisi Patrik Vieyra qaldıqları oteldə trabzonlularla oyundan öncə jurnalistlər üçün mətbuat konfransı keçirib. 46 yaşlı fransalı mütəxəssis hələ ki məşqçi karyerasında ciddi uğur qazanmayıb və onun futbolçu karyerası daha parlaqdı. Amma “Kristal Pelas” onun rəhbərliyi altında heç də pis təsir bağışlamır. Qətərdə davam edən DÇ, komandasının durumu və başqa məqamlar haqda danışan Vieyra bunları deyib:
“Mundialda qəlbim, təbii ki, Fransa ilə döyünür. Amma İngiltərə ilə duel çox çətin keçəcək. Çünki İngiltərədə çalışıram və o komandanı yaxından tanıyıram. İngilislərin də istedadlı oyunçuları var. Onlar da mərhələni adlaya bilərlər. Bərabərsəviyyəli bir qarşılaşma olacağını düşünürəm. Təəssüf ki, Fransanı dəstəkləmək üçün Qətərə yollana bilmədim. Amma bir çox dostum ora gedib. Təşkilatçılıq yüksək səviyyədədi və hələ ki heç bir neqativ durum yaşanmayıb. DÇ-nin mövsümün ortasında keçirilməsi hər birimiz üçün yenilikdi. Buna alışmalı və öhdəsindən gəlməliyik. Hər məşqçi çalışacaq ki, komandasının fiziki durumunu əvvəlki səviyyədə saxlasın. Komandamda olan hər futbolçudan maksimum dərəcədə fayda almağa çalışıram. Bu hazırlıq dönəmi bizim üçün çox önəmlidi. Ayın sonunda “Fulhem”lə oyunumuz var. O matça hazır vəziyyətdə çıxmaq istəyirik. “Arsenal” barədə nə düşünürəm? İlk 14 turda çox yaxşı və sabit futbol sərgilədilər. Təbii ki, çempionluq şansları var. Amma mövsüm uzundu və hələ çempionluqdan bəhs etmək çox tezdi. DÇ-dən dərhal sonra keçirəcəkləri matçların nəticələri çox önəmli olacaq. “Trabzonspor”a gəlincə, bu komandanın necə çılğıni fanatlara malik olduğunu hər kəs bilir. Onlardan aldıqları enerjini meydanda göstərməyə çalışırlar. Hazırlıq oyununa da, rəsmi matça da eyni konsentrasiya ilə çıxırlar. Belə rəqiblə oynamaq bizim üçün çox faydalı olacaq. Burda mükəmməl şərait olduğu üçün buranı seçmişik. Otellər, bazalar, meydanlar çox yaxşı durumdadı. Türkiyə mətbəxi də ləzzətlidi”.
