“Qarabağ” Avropa Liqasaında mübarizəyə qələbə ilə başladı.

“Football-plus.az” “Vestri”ni darmadağın edən komandanın baş məşqçisi Qurban Qurbanovun oyunsonrası mətbuat konfransından hesabatı təqdim edir.

- Azarkeşlərə təşəkkür etmək istəyirəm. Stadionu doldurmuşdular və sanki Çempionlar Liqasının oyunundaydılar. İlk matçdan başa düşdük ki, məsuliyyətli olmalıyıq və azarkeşlərin bizdən gözləntiləri böyükdü. Futbolçulara da təşəkkür edirəm, ilk oyunda qələbə vacib idi. Düzdü, narazı qaldığım məqamlar oldu. Bu da futbolçuların hazırlığının fərqli səviyyədə olmasıyla bağlıdı. İkinci hissədə yorğunluq hiss olunurdu, amma dəyişikliklərdən sonra komanda daha diri göründü. Yekunda 3:0 hesablı qələbə qazandıq. Rəqib də ciddi müdafiə olunurdu, bizi yaxşı təhlil etmişdilər. Cavab görüşündə daha məsuliyyətli olmalıyıq. Bu oyunun gərgin keçməsinin xeyrimizə olacağını düşünürəm. Ümumi götürəndə pis deyildik. Avrokuboklarda qələbə qazanan digər komandalarımızı da təbrik edirəm. Azərbaycanın UEFA reytinqində xalları artır və bu, ölkə üçün çox vacibdi.

– Montielin kənarda qalması nə ilə bağlıdı?
– Zədəsi yoxdu. Futbolçuların hamısını heyətə sala bilmədik. Bu matçda kənarda qalanlar növbəti mərhələdə meydana çıxa bilər.

– Hansı mövqeyə transfer gözlənilir?
– Qapıçı mövqeyindən başqa digər mövqelərə oyunçu axtarırıq.

– Sabiq futbolçularınız Yassin Benzia ilə Julio Romanonun qayıdışı gündəmdədi?
– Səhv etmirəmsə, Romao artıq klub tapıb. Benzia ilə bağlı da hansısa fikirdə olmamışam.

– Cavab oyununda heyətlə bağlı hansısa dəyişiklik olacaq?
– İlk matçlarda çox diqqətli olmalıyıq. Futbolçuların yüklənməsinə fikir verməliyik. Rotasiya ilə bağlı qərarı indi verə bilmərik. Qarşıda hələ beş hazırlıq günümüz var. Vəziyyətə baxıb, qərarlar verəcəyik.

– Əli Bəşirovun və digər gənc futbolçuların şans qazanması realdı?
– Əli toplanışın ilk günündən bizimlədi. Maksimum çalışacağıq ki, ona da şans yaradaq. Çox bacarıqlı və istedadlı futbolçudu. İndidən bu atmosferə uyğunlaşmasını istəyirik. Hər bir gənc üçün maksimum şərait yaradacağıq.

– Elvini bağışlamısız?
– Qayıtdı (gülür). Çox geniş şərh verməyə ehtiyac yoxdu. Real təklif olsaydı, gedə bilərdi. Amma indi burdadı. Qaydalar var və hamımız ona riayət etməli, lazım gələrsə, sərt reaksiyalar verməliyik. Onunla da görüşlərimiz oldu.

– Zakaria Savo haqda fikriniz nədi?
– Savo və Kamilo Duran fərqli futbolçulardı. Hərəsinin müəyyən özəllikləri var. Savo da hələ ideal vəziyyətdə deyil, çalışmalıdı. Bəzi elementlərdə daha yaxşıdı, bəzilərində çatışmazlıqları var. Duranın da özünəxas keyfiyyətləri var idi. O da olsaydı, pis olmazdı (gülür).

– Mateus Silvanın da gedəcəyi ilə bağlı xəbərlər var. Transferi nə dərəcə realdı?
– Xeyr, inşallah, bizimlə olacaq. Maraqlananlar var idi, amma komandada qalacaq.

– Əli Bəşirova rəsmi təklif olarsa, getməsinə şərait yaradacaqsız?
– Əli üçün ən yaxşısını etməyə çalışacağıq. Faydalı təklif olarsa, gələcəyi üçün mane olmayacağıq. Bəlkə də burda qalması daha xeyirli oldu. Yaxşısı nədisə, ona əməl etmək borcumuzdu.

– Haqqında çox danışılır. Sizcə, bu, onun karyerasına mənfi təsir etməz?
– İnanmıram, fərqli uşaqdı. Problem olacağını düşünmürəm. Hər kəs onunla çox yaxşı davranır. Əli üçün yaxşısını etməyə çalışacağıq.

İSRAYIL XEYRULLAYEV