Mərakeş yığmasının 1/8 finalda penalti seriyasında İspaniyaya qalib gəlməsi Afrika ölkəsində böyük sevincə səbəb olub.

Football-plus.az xəbər verir ki, ölkənin irili-xırdalı bütün şəhərlərinin küçə və meydanları böyük bayrama çevrilib.

Azarkeşlər əllərində dövlət bayraqları ilə küçələrə axışıblar. Milli komandanın tarixində ilk dəfə mundialın 1/4 finalına çıxması dünyanın bir sıra ölkələrində yaşayan mərakeşlilərə də sevinc bəxş edib. Qətərin Doha, Fransanın Paris, İspaniyanın Madrid, Barselona və Bilbao, İngiltərənin London, Belçikanın Brüssel, Niderlandın Amsterdam, Haaqa, Rotterdam, İtaliyanın Verona şəhərlərində çərşənbə axşamından çərşənbəyə keçən gecə Mərakeş əsilli futbolsevərlərin şadyanalığı olub.

Amma bəzi şəhərlərdə arzuolunmaz hadisələr də baş verib. Niderland, Belçika və İtaliyada qələbəni qeyd edən azarkeşlərlə polislər arasında qarşıdurma yaşanıb. Asayişi pozan fanatlar saxlanılıblar.