Hakimi Mərakeşi niyə seçdiyini dedi
Bu gün keçiriləcək 1/8 finalın Mərakeş - İspaniya matçı ərəfəsində Əşrəf Hakimi avropalı jurnalistlərin maraq dairəsinə düşüb.
Football-plus.az xəbər verir ki, o, milli komanda seçiminə aydınlıq gətirib.
İspaniyanın paytaxtı Madriddə mərakeşli ailəsində dünyaya gələn Hakimi bu ölkənin milli komandasından imtina etməsinin səbəbini açıqlayıb. Xatırladaq ki, 2006-cı ildə “Real”ın akademiyasına qoşulan 24 yaşlı müdafiəçi 2020-ci ilə qədər Madrid klubunda olub. Mərakeş millisinin üzvü olan PSJ-nin oyunçusu “Marca”ya açıqlamasında bunları deyib:
“İspaniyanın gənclərdən ibarət komandasında olmuşam. Əlaqələr var idi. Vaxtilə özümü sınamaq üçün İspaniya millisinin düşərgəsində olmuşam. Bir-iki gün Las Rozasda qaldım və başa düşdüm ki, bura mənim üçün uyğun yer deyil, özümü evdəki kimi hiss etmirəm. Hisslərimə görə İspaniya yığmasından imtina etdim. Orda əvvəllər gördüyüm Mərakeş mədəniyyətinə aid olan bir şey yox idi. Mən Mərakeşdə oynamaq istəyirdim”.
Əşrəf İspaniya ilə bugünkü oyunla bağlı daha maraqlı açıqlama verib:
“Öz oyunumuzu sərgiləməyə çalışacağıq. İspanların bizdən çəkindiklərini düşünürəm. Rəqibin topa sahib olmağı xoşladığını bilirəm. Amma Mərakeş yığması öz oyununu göstərməklə rəqibə mane olmağa çalışacaq”.
