Noyabrın 17-də “Formula-1” pilotları məşhur aşpaz Nüsrət Gökçənin restoranlarından birinə yığışmışdı.

Təbii ki, yığışmaq üçün səbəb var idi. “Aston Martin”in alman pilotu Sebastyan Fettel karyerasındakı son yarış – Əbu-Dabi “Qran-pri”si ərəfəsində qonaqlıq verirdi. Qonaqlıq xərci sizi maraqlandırırsa, deyim ki, 166 min dollara başa gəlib. Daha Fettel təkbaşına hesabı bağlayıb, yoxsa qalan pilotların da cibindən pul çıxıb – bunu deyə bilmərəm.

Xatırladaq ki, 35 yaşlı alman “Formula-1” karyerasına 2007-ci ildə, ABŞ “Qran-pri”sində polşalı Robert Kubitsanı əvəz etməklə başlayıb. Macarıstan mərhələsindən etibarən amerikalı Skott Spidin yerini tutaraq “Toro Rosso”da çıxış edib. 2010-13-cü illər aralığında 4 dəfə dünya çempionu olub. Ümumilikdə 298 mərhələyə qatılıb, 53 dəfə birinci olub, 11 dəfə podiuma qalxıb.

Qonaqlıq öz yerində, deyəsən, Fettel hələ də “Formula-1” dünyasından ayrıla bilmir: “İstərdim deyim ki, həmişəlik gedirəm, ancaq düzünü desəm, bilmirəm. Hər kəs mənə deyir ki, üç aydan sonra qayıtmaq istəyəcəksən. Bəlkə də iki ildən sonra pilot kimi qayıdam. Və ya komandaya. İndi isə ailəmlə birgə olmağın sevincini yaşamaq istəyirəm. Baxarıq”.

Fettel onu da əlavə edib ki, karyerasını bitirmək qərarı özünə məxsusdu və ispaniyalı Fernando Alonsonun “Aston Martin”ə keçidi ilə heç bir şəkildə bağlı deyil. Yeddiqat dünya çempionu, “Mersedes” pilotu Lüis Hemilton da Fettelin gedişi ilə bağlı danışıb: “Pilot kimi uzun yol keçmişik və kişi kimi böyüməkdəyik. Trassda nə baş verir-versin, biz böyüyür və gündən-günə yaxşılaşırıq. Ona görə bir araya gəlmişik ki Sebin “Formula-1”dəku uğurlu karyerasını bayram edək. Bu elə gecədi ki, heç vaxt unuda bilmərəm. Bir çox pilot sonradan qayıdır, o da yəqin qayıdacaq. Bu üzdən Əbu-Dabi mərhələsinin onun sonuncu yarışı olduğuna inanmıram”.