"Şamaxı" Misli premyer-liqasının 13-cü turu çərçivəsində səfərdə "Turan Tovuz"u 3:1 hesabı ilə məğlub edib.

"Footbal-plus.az" xəbər verir ki, matçdan sonra keçirilən mətbuat konfransında meydan sahiblərinin çalışdırıcısı Ayxan Abbasov jurnalistlərin suallarını cavablandırıb:

- Futbolçularda sanki oyunun əvvəlində hesabı dəyişməyə inam var idi. Sonra isə bu inam itdi. Bunun səbəbi nədi?
- Tez qol buraxmağımız tələskən oynamağımıza səbəb oldu. İstədiyimiz epizodlar oldu, təəssüf ki, sonluq çatmadı. İlk hissənin son dəqiqəsində qol buraxmaq pis təsir etdi. Sonra dəyişikliklərə əl atdıq. Həftə ərzində oyuna hazırlaşırsan. Amma futbol elədir ki, istəmədiyin hallar baş verir. Risk etmək lazım idi. Meydana hücumameyilli futbolçuları buraxdıq. Hesab bizə rahat oynamağa imkan vermədi.

- Sizə elə gəlmir ki, ard-arda qazanılan qələbələrdən sonra futbolçularda arxayınlıq yaranıb?
- Xeyr. Biz hələ heç nə etməmişik, 15 xal toplamışıq. Mən futbolçularımı tanıyıram, arxayınlıq deyil. Bu gün alınmadı.

- Vüsal Məsimov ilk dəfə premyer-liqa matçına çıxdı. Daha təcrübəli futbolçu buraxa bilməzdiz meydana?
- Kimi buraxım? Baxın görək bizdə cinah müdafiəçisi var? Ehtiram, Ben Aziz zədəlidi. Məcburiyyətdən İmedini cinahda oynadırdıq. Onu da ikinci hissədə hücuma çəkəndən sonra Vüsaldan başqa cinah müdafiəçisi yox idi. Bu gün bizi təcrübə uduzdurmadı. Rəqib istəkli idi. Bu gün bizdə fərdi keyfiyyətlər çatmadı.

- Hakimin idarəçiliyindən razı qaldız?
- Normal idi. Elə böyük problem olmadı.

- Sıfırdan komanda qurmusuz və 15 xal toplamısız. Amma azarkeşlər məğlubiyyəti həzm edə bilmir. Matçdan sonra kiçik insident də oldu. Buna sözünüz nədi?
- Bura gələndə ilk sözüm o olmuşdu ki, səbrli olmalıyıq. Bu gün azarkeş iki cürdü. Bir var klubun azarkeşi, bir də var tamaşaçı. Ayda bir dəfə stadiona gəlir və öz iddiasını qoyur. Bu da normaldı. Onları da başa düşürəm. Amma 13-cü turdu və mən çətinlikdən danışmamışam, danışmayacam da. Çətinlikləri bilib bura gəlmişik, kömək etmək istəyirik. Səbriz olsalar, gələcəkdə mən də öz qərarımı verə bilərəm. Bu gün mənim əlimdə böyük heyət, böyük büdcə yoxdu ki, hər komandaya qalib gəlim. Bunun qarşısı alınmasa, yəqin ki, burda çox qalmayacam.

- Bölgələrdə azarkeşlər gəlmə məşqçini bəyənmir. Bu barədə nə deyə bilərsiz?
- Problem yoxdu. Bu gün kimsə özünü hazır sayırsa, postumu təhvil verə bilərəm.

- Natan Oduvanın zədəsi nə dərəcədə ciddidi?
- Hələ müalicədədi. Çalışacağıq ki, "Kəpəz"lə oyuna hazır olsun.