"Şamaxı" Misli premyer-liqasının 13-cü turu çərçivəsində səfərdə "Turan Tovuz"u 3:1 hesabı ilə məğlub edib.

"Footbal-plus.az" xəbər verir ki, matçdan sonra keçirilən mətbuat konfransında qonaqların baş məşqçisi Vüqar Əsgərli jurnalistlərin suallarını cavablandırıb:

- Həmişə Tovuz səfəri çox ağır keçir. Bu oyuna çox ciddi hazırlaşmışdıq. Bizə xal lazım idi. "Turan Tovuz"un yaxşı müdafiə olunduğunu bilirdik. Bu müdafiəni yarmaq üçün bizə rotasiyalar lazım idi. Qol imkanlarını qola çevirə bilmirdik. Həftə ərzində bunun üzərində işlədik. Bu gün sevincliyik. Futbolçularımı təbrik edirəm. Səbrli olmalıyıq, bu oyunçulara inanmaq lazımdı. Onlar bizim gələcəyimizdi. Hər oyuna motivasiya ilə çıxırlar. "Turan Tovuz"a uğurlar arzulayıram.
- Bu gün "Turan Tovuz"un heyətində 5 itki var idi. Bu, sizin işinizə nə dərəcədə yaradı?

- Biz bütün matçlara hazırlaşanda rəqibin oyun stilinə fikir veririk. "Turan Tovuz"un heyətində kifayət qədər yaxşı futbolçular var. Bu gün istədiyimiz oyunu sərgiləyə bildik. Komandamız matça yaxşı köklənmişdi.

- Qələbə üçün mükafat olacaq?

- Təbii ki. Məbləği bilmirik. Biz pula görə futbol oynamırıq. Bizim üçün ən böyük mükafat ilk qələbəmizdi.

- Növbəti turda əsas rəqibiniz olan "Sumqayıt"la qarşılaşacaqsız. Bu görüşdən gözləntiniz nədir?

- Biz hər nəticədən sonra həmin oyunu unuduruq. "Sumqayıt"la matçın ciddiyyətini başa düşürük. Oyuna az da olsa, vaxtımız var. Ümid edirəm istədiyimiz oyunu sərgiləyə biləcəyik.

- Bu qələbə arxayınlıq yaratmayacaq?

- Tablo göz qabağındadı.

- Matç bitəndən sonra qarışıqlıq yarandı. Bu, nə ilə bağlı idi?

- Futbolçular arasında gərginlik oldu. Oyunun sonudu, emosionallıq var. Orda baş verənlər orda da qaldı. Uşaqlarla danışılası bir şey yoxdu. Özləri də dedilər-güldülər, barışdılar.

- Kamran Quliyev Amil Yunanovu nə dərəcədə əvəz edə bilir?

- Kamran gəncdi, çox istedadlıdı. Oyundan-oyuna istədiyimizi ondan ala bilirik. Amilin yerini doldura bilir. Təbii ki, Amil də olsa, ikisi yaxşı tandem olardı. Tək Kamran yox, Rövşənin də oyunundan çox razı qalırıq.

- Rauf Hüseynli bundan da yaxşı çıxış edə bilər?

.- Bütün futbolçularım bundan da yaxşı çıxış edə bilərlər. Özlərinə inanmalıdılar. Təzyiqlərə fikir verməməliyik, normal şeydi.

- Rauf Əliyev transfer siyahınızda var?

- Tək Rauf yox, çox oyunçular siyahımızda var. Danışıqlar aparırıq. Birinci yarı bitdikdən sonra müzakirə aparacağıq.