Aftandil Hacıyev "Səbail"lə yolları ayırandan sonra bir müddət ictimaiyyətdən uzaq qaldı.

Sonra onu tez-tez idman verilişlərində ölkə futbolundakı problemlərdən danışarkən görməyə başladıq. Bir neçə gün əvvəl isə PRO kateqoriyasının tələblərinə uyğun "Qalatasaray"ın düşərgəsində olub. Onunla söhbətə də məhz bu mövzuya “işıq salmaqla” başladıq.

- "Qalatasaray"ın bazasında olduz. Ən çox diqqətinizi nə çəkdi?

- 5 gün "Qalatasaray"ın bazasında oldum. Klubun infrastrukturu, akademiyası, stadionu, məşqçiləri, rəsmi şəxsləri ilə tanış oldum. Məşq prosesini yaxından izlədim. Ümumiyyətlə, bir məşqçi kimi məni maraqlandıran məsələlərlə bağlı qeydlər apardım. Səfərim həm xoş oldu, həm də təcrübə topladım.

- "Qalatasaray" hazırda ən çox nəyə fikir verir?

- Bir qədər əvvəl qeyd etdiyim kimi, klubun bazasında, akademiyasında oldum. Onlar daha çox gənc futbolçuların yetişdirilməsində maraqlıdı. Yəni uşaq futboluna xüsusi həssaslıq və qayğı ilə yanaşırlar. Hazırda "Qalatasaray" akademiyasında 26 futbolçu Türkiyənin U-21-i də daxil olmaqla aşağı yaş qrupları üzrə yığmalarının heyətində yer alır. Rəhbərlik bu rəqəmi yaxın ilərdə ən azı 40-a qaldırmağı hədəfləyir. Akademiyanın tərkibində olan komandalarda çox güclü rəqabət var. "Qalatasaray"ın sabiq ulduz futbolçusu Ayhan Akmanın oğlu Həmzə Akman da akademiyanın üzə çıxardığı istedadlı gənclərdəndi. Hazırda Türkiyənin U-19 millisinə dəvət alır. Hətta o, azərbaycanlı həmyaşıdlarına qarşı da oynayıb. Düşünürəm ki, "Qalatasaray"da yetişən gənclər Türkiyə millisini yenidən zirvələrə qaldıracaq.

- "Qalatasaray"ın əsas komandasının məşqində də iştirak etdiz?

- Əlbəttə. Hətta Okan Buruku yaxından tanıdım. Son dərəcə savadlı, tələbkar, bir o qədər də qayğıkeş mütəxəssisdi. Onunla tez-tez görüşüb söhbət edirdim.

- Okan Burukun Azərbaycan futbolu haqda təsəvvürü necədi?

- Futbolumuzla bağlı yetərincə məlumatlıdı. Çoxları kimi o da "Qarabağ"la daha çox maraqlanır. Amma son matçlarda uğurlu çıxış edən millimizlə bağlı da yaxşı təəssüratı var.

- Daha hansı məşhurla görüşdüz?

- İtaliya millisinin ulduzu Andrea Pirloyla.

- Maraqlıdı, onunla nə haqda söhbət etdiz?

- Onunla cəmi 15 dəqiq söhbətimiz oldu. Hazırda əsas məqsədi “Fatih Karagümrük”ü zirvələrə daşımaqdı. İtaliya millisinin sabiq üzvü müasir futbolun sirlərini yaxşı bilən mütəxəssisdi. Çalışır ki, komandasına müasir futbolun fəlsəfəsini aşılasın.

- Sizin azərbaycanlı məşqçi olduğunuzu biləndə vaxtilə seçmə mərhələdə qarşılaşdığı millimizdən də söz açdı?

- Bəli, qısaca xatirələrini yeniləyərək millimizə qarşı keçirdiyi oyunlardan biri haqda danışdı. Əsasən həmyerlisi Canni de Byazinin yığmamızın baş məşqçi postunda qalıb-qalmayacağı barədə maraqlandı. Dedim ki, yaxın günlərdə qərar veriləcək.

- Yeri gəlmişkən, De Byazi daha bir seçmə mərhələdə yığmaya rəhbərlik edəcək. Buna münasibətiniz?

- İtaliyalı qarşısına qoyulan tələbləri yerinə yetirə bilmədi. Yəni Azərbaycan millisi qrup lideri kimi B liqasına yüksəlməliydi. Buna rəğmən, AFFA İcraiyyə Komitəsi De Byazini postunda saxladı. Düşünürəm ki, yığmanın son iki qarşılaşmada göstərdiyi oyun və qazandığı qələbələr ona yenə şans verilməsiylə nəticələndi.

- De Byazinin əvəzinə ölkənin bir nömrəli komandasına yerli məşqçi rəhbərlik etsə, daha yaxşı olmaz?

- Birmənalı olaraq düşüncəm belədi ki, bütün ölkələrin milli komandalarının “sükanı arxasında” yerli məşqçi dayanmalıdı. Çünki motivasiya, futbolçuları yaxından tanımaq, onlarla dil tapmaq, milli ruh çox önəmlidi. Əcnəbi mütəxəssis nə qədər peşəkar, nüfuzlu olsa da, sadaladıqlarımı həyata keçirə bilməsə, uğur qazana bilməz. Yalnız uzun illər Azərbaycanda yaşayan, az-çox dəyərlərimizə, mentallığımza bələd olan və dilimizi bilən millimizlə uğurlar qazana bilər. Yalnız yığmada yox, klublarımızda da maksimum öz mütəxəssislərimizə yer verməliyik.

- Siz həm də millinin sabiq üzvü olmusuz. Komandaya rəhbərlik edən hansı əcnəbi məşqçinin faydasını görmüsüz?

- Mərhum Karlos Alberto Torresin vaxtında daha çox milliyə cəlb edilmişəm. Meydana çıxıb maksimum faydalı olmağa çalışmışam. Hamımız meydanda can qoyurduq. Braziliyalı mütəxəssis nə qədər bizi yaxşı hazırlamağa çalışsa da, yenə güclü motivasiya verə bilmirdi. Çünki o başqa millətin, dövlətin nümayəndəsi, fərqli psixologiyaya malik biri idi. Ona görə deyirəm ki, bütün dünya ölkələrinin millilərində yerli mütəxəssislər çalışmalıdı.

ABDULLA İSMAYILOĞLU