Kərim Benzema mükafat bolluğuna düşüb. “Real”ın aparıcı futbolçusu 2021/22 mövsümünün nəticələrinə əsasən üç fərdi mükafata layiq görülüb.

Football-plus.az xəbər verir ki, fransalı hücumçu yerli idman nəşri “Marca”nın hər il keçirdiyi mərasimdə “Piçiçi kuboku” (La Liqada mövsümün bombardirinə təqdim edilir), “Di Stefano kuboku” (La Liqada mövsümün ən yaxşı oyunçusuna təqdim edilir) və azarkeşlərin seçimi ilə “Mövsümün oyunçusu” mükafatını alıb. Xatırladaq ki, Benzema ötən mövsüm “Real”la İspaniya çempionu olmaqla yanaşı, 27 qolla La Liqanın ən yaxşı bombardiri adını da qazanmışdı.

Yeri gəlmişkən, 34 yaşlı futbolçu ilə bağlı daha bir xoş xəbər yayılıb. O, zədəsini sağaldıb. “El Chiringuito TV”nin xəbərinə görə, fransalı hücumçu La Liqanın 7-ci turunun “Osasuna” ilə oktyabrın 2-nə təyin olunan oyununda iştirak edə bilər. Benzema Çempionlar Liqasının qrup mərhələsinin sentyabrın 6-da keçirilən “Seltik”lə matçında (3:0) zədələnmişdi.