Mövsümün sonuna 6 mərhələ qalmış Karlos Sayns komanda yoldaşı Şarl Leklerdən 32 xal geri qalmaqla şəxsi hesabda 5-ci pillədə qərarlaşıb.

“Ferrari”nin pilotu son müsahibəsində bu mövsümdəki çıxışına ilkin qiymət verib, eləcə də mövsümün sonunu necə görməsi ilə bağlı fikirlərini bölüşüb.

- Sinqapurda keçiriləcək növbəti mərhələdən nə gözləyirsən?
- Fiziki yükləmə baxımından bizi çix çətin yarış gözləyir, ancaq yüksək hərarət və rütubət üzündən orda həmişə belə olub. Mövsümün ən mürəkkəb mərhələsi olduğuna görə Sinqapura bir həftə əvvəl uçacam ki, belə şəraitə uyğunlaşım və məşq edim. Düşünürəm ki, trass maşınımıza uyğun ola bilər, belədə qələbə şansımız artacaq. Mövsümün sonunda qalib gəlmək əla olardı.

- Mövsümün sonluğundan nə gözləyirsən?
- Başımıza gələn bütün xoşagəlməz halları nəzərə alaraq, istərdim ki, mövsümü sabit şəkildə başa vuraq. Son altı mərhələni sakit keçirmək, problemlərdən qaçmaq, ritmi tutmaq və növbəti ilə hazırlığa başlamaq istəyirəm.

- 2023-də “Ferrari” maşınından nə gözləmək olar?
- Yaxşı təməlimiz var, bunun üzərində tərəqqi edə bilərik. Etibarlılıq və sabitlik kimi aspektlərdə “artırmaq” lazımdı. Ancaq unutmaq olmaz ki, bu mövsüm ideal təsir bağışlayan “Red Bull” ilə mübarizə apardıq. Dərs çıxarmalı və gələn il onların səviyyəsinə qalxmalıyıq.

- “Ferrari” 2023-də titul uğrunda mübarizə aparacaq?
- Düşünürəm ki, bəli. Bir qədər yaxşı çıxış etsəydik, elə bu il də titul uğrunda mübarizə apara bilərdik. Hərçənd etiraf etmək lazımdı ki, mövsümün əvvəlində bəxtimiz gətirdi. Növbəti mövsümdə yeni şans qazanacağıq, ondan yararlanmağa çalışmalıyıq. Bu il “Ferrari”də irəliyə doğru böyük addım atdıq və indi qarşımıza daha yüksək hədəflər qoymalıyıq.

- Bu il karyeranda ilk dəfə mərhələ qalibi oldun. Mövsümü özün üçün necə qiymətləndirirsən?
- Düzünü desəm, tam bacarığım deyil. Unuda bilməyəcəyim çoxlu yaxşı mərhələ və məqam oldu. Məsələn, ilk qələbəni deyərdim. Ancaq mövsüm mənə Amerika karusellərini xatırladır. Heç də həmişə yüksək temp yaxalaya bilmədim. Titul uğrunda mübarizədə vacib olan sabitlik də çatışmadı. Komandamız daha da “artırmalıdı” və mən bunun üzərində işləmək fikrindəyəm.

- Maşını yüksək sürətlə idarə edəndə qorxu hiss edirsənmi?
- Yox, heç vaxt belə hiss olmayıb məndə. Qorxu hiss edəcəyim gün karyeramı bitirəcəm. Bu hiss ən yüksək sürətlə gedərkən yol verdiyim risklə bir araya sığmaz. Əminəm ki, qorxu pilota ancaq mane ola bilər.

- “Ferrari”nin istənilən pilotunu daim müşayiət edən tənqidin öhdəsindən necə gəlirsən?
- Məni bununla bağlı əvvəlcədən xəbərdar etmişdilər. Demişdilər ki, İtaliya mediasının hədsiz sərt tənqidi ilə üzləşəcəksən. Yalnız “Ferrari”yə düşəndən sonra anlayırsan ki, komandanın avtoidman dünyasında rolu necə böyükdü və o necə diqqət mərkəzindədi. Bu il hətta ünvanımıza heç də həmişə haqq etmədiyimiz tənqidlər də yağdı. Ancaq bu da işimizin bir hissəsidi. “Ferrari”nin şərəfini qoruduğuma görə fəxr edirəm və tənqid olunmaqda problem görmürəm.

- Arzun çin olub?
- Düşünürəm ki, “Ferrari”nin şərəfini qorumaq hər pilotun arzusudu. Bu komandanın bir hissəsi olmaq və qalib gəlmək – pilotun ümid edə biləcəyi maksimumlardı.

- Həmvətənin Fernando Alonso üçün mövsümü necə qiymətləndirirsən?
- O, yaxşı mövsüm keçirir. “Aston Martin”lə növbəti il üçün layihə də maraqlı olacaq. Fernando gec-tez ön sıralara çıxacaq. Onun sakit və qətiyyətli olduğunu görürəm.