Dünya çempionatının 2-ci mərhələsi təhlükəli və əsəbi alındı.

Husilərin cümə günü Ciddə trassı yaxınlığındakı neft ambarına raket hücumu iştirakçıları və təşkilatçıları bir qədər həyəcanlandırsa da, ortaq fikir belə oldu ki, yarışı təxirə salmağa dəyməz.

Təsnifat mərhələsi iki dəfə qırmızı bayraqla dayandırıldı. Əvvəlcə Latifinin maşını qəzaya uğradı. Ardından Şumaher sürətli döngədə sükana nəzarəti itirdi və maşını sıradan çıxdı. Həkimlər “Haas”ın pilotunun sağlıq durumunda hansısa ciddi problem görməsə də, komanda bu “Qran-pri”də yalnız Maqnussenlə yarışmağa qərar verdi. Nəhayət, yarışa 40 dəqiqə qalmış növbəti dram yaşandı: texniki problemlər üzündən təsnifat mərhələsinə qatılmayan Sunoda əsas yarış ərəfəsində də mühərriki qaydaya sala bilmədi.

Finişə birinci çatan Ferstappen mövsümdə ilk qələbəsini qazandı və titul uğrunda mübarizəyə qayıtdı. Lekler 2-ci, onun komanda yoldaşı Sayns 3-cü oldu. Ötən mövsüm Ferstappenlə son ana qədər çempionluq mübarizəsi aparan Hemilton 10-cu ola bildi. Britaniyalı karyerasındakı ən pis mərhələlərdən birini keçirdi.

Reaksiyalar
Maks Ferstappen:

“Əla yarış alındı. Liderlik uğrunda inadla mübarizə apardıq. Rəqiblər döngələrdə çox sürətli idi, biz isə düz yolda. Təkərlər çox tez yeyildi. Yürüşün sonunda tempimiz başqalarından bir qədər yüksək idi. Çətin olsa da, sonda önə çıxa bildim”.

Şarl Lekler:

“Əla yarış idi, xoşuma gəldi. Sərt, ancaq təmiz mübarizə getdi. Hər yürüş belə olmalıdı. Hərçənd, əlbəttə, məyusam. Çünki qalib gəlmək istəyirdim. Maksla həmişə aramızda qarşılıqlı hörmət olub. Şəhər trassında yarışdıq. Nadir hallarda bugünkü qədər güclü hücum edirik”.

Karlos Sayns:

“Serxip Pereslə amansız mübarizə apardım. Düşünürəm ki, təhlükəsizlik maşını ilə bağlı məsələdə onun bəxti gətirmədi. Ancaq qayda qaydadı. Restartdan sonra 3-cü yeri qorumaq lazım idi. “Red Bull”un maşınları son 10 dövrədə çox sürətliydi. Bəhreyn mərhələsi ilə müqayisədə müəyyən tərəqqiyə nail oldum”.

Fakt
Karyerasında 21-ci dəfə finişə hamıdan birinci çatan Ferstappen bu göstəricidə Mika Hakkineni arxada qoydu və ümumi reytinqdə 15-ci yerdə qərarlaşan Kimi Raykkonen ilə bərabərləşdi. Niderlandlı pilot elə bu mövsüm ilk “8-liy”ə yüksələ bilər. Hazırda 8-ci yerdə 27 qələbə ilə Cim Klark qərarlaşıb. Qələbə sayına görə rekord Lüis Hemiltona məxsusdu (103). Mihael Şumaher 91, Sebastyan Fettel 53 dəfə fəxri kürsünün ən yüksək pilləsinə qalxıb.