“Zirə” ilə matçdan sonra media nümayəndələri qarşısına çıxan "Sumqayıt"ın baş məşqçisi Aleksey Baqa komandasının hələ də qol vura bilməməsinə münasibət bildirərkən "bunu bilsəydim, reseptini sizə deyərdim. Amma işləyirik. Görürəm ki, uşaqlar da çalışır. Vaxt barədə nəsə deyə bilmərəm. Hamiləlik deyil ki, 9 aydan sonra nəsə gözləyək" cavabını verib.

Əhsən, əla cavabdı. Bir komandanın baş məşqçisi yetirmələrinin nə vaxt qol vuracağını bilmirsə, futbolla ginekologiyanı müqayisə edirsə, ona ancaq “bravo”, yeri gəlsə, “molodes” deyib alqışlamaq lazımdı. Yerinə düşən cavabdı. Buna görə Baqaya hörmətim birəbeş artdı. Baş məşqçi hardan bilsin ki, komandası nə vaxt qol vuracaq? Onu mən, sən, bazarda göysatan Fatmanisə xala, tikintidə bənna işləyən Əlverdi qardaş bilməlidi. Baş məşqçinin işi ayın sonunda karta köçən maaşını saymaq, arada dərd-qəmdən uzaqlaşmaq, ötən günləri yada salmaq, uşaqların gələcəyini düşünmək üçün Dənizkənarı bulvarda gözdən-könüldən uzaq küncə çəkilib xəyallara dalmaqdı. Şair necə deyib, qalanı əfsanədi.

Bu yerdə özümdə cəsarət tapıb, hörmətli belaruslu mütəxəssisə “Sumqayıt”ın niyə qol vura bilməməsinin səbəbini izah etməyə çalışacam. Bunun üçün hansı əzaba qatlandığımı, neçə-neçə kitab vərəqlədiyimi, mötəbər akademik və professorlar ilə söhbətləşdiyimi bir mən, bir də bu yay ayağı top tutmayanları legioner adı ilə “Sumqayıt”a sırıyan agentlər bilir.

Deməli, Nyu-York akademiyasının müxbir üzvü, Azərbaycan Elmlər Akademiyasının “futbol komandasında 11 nəfər olur” institutunun direktoru Şimşək İldırımov mənimlə söhbətində bildirdi ki, qol vurmaq üçün komanda irəli getməli, hücum qurmalı, “çərçivə” istiqamətində zərbə endirməlidi. 90 dəqiqə qorxaq futbol sərgiləyən, meydanın mərkəzini keçməyə ürək etməyən, birinci zonada ətdən çəpər düzən, ardıcıl 3 ötürmə etməyən komandadan qol gözləmək, erkək fildən bala gözləmək kimi bir şeydi (lənət şeytana, deyəsən, mən də Baqa kimi ginekologiyaya yönəlirəm). Hörmətli ziyalımız onu da əlavə etdi ki, “Qarabağ” kimi komanda ilə matçda 8 nəfərlə müdafiəyə oturmağı başa düşmək olar. Qurbanovun komandası ilə “Sumqayıt” arasında keyfiyyət baxımından yerlə-göy qədər fərq var. Ancaq “Zirə” kimi kollektivlərlə oyunda bütün komanda ilə geri çəkilməyə, “Məmmədağa, vur qabağa” futboluna ginekologiyada bir ad qoymaq mümkündü: mən uşaq istəmirəm. Futbol dili ilə desək, yəni bizə qol lazım deyil. Əsas odu, özümüz məyus olmayaq. Ziyalımız belə də deyib, söhbəti bitirməyimi istədi.

Bu yay tarixində ilk dəfə “Sumqayıt”a legioner transfer etməyə icazə verildi. Hazırda Baqanın sərəncamında 9 legionerin olduğunu da diqqətinizə çatdırım. Düşünmək olardı ki, “kimyaçılar” ötənilki fiaskodan sonra imicini düzəltmək üçün fürsətdən maksimum yararlanıb, ən azı ilk “5-lik” uğrunda mübarizə aparacaq komanda formalaşdıracaq. Əvəzində nə görürük? Yarıtmaz transferlər, komandasını uğura daşıya biləcək resepti tapa bilməyən baş məşqçi…

Aleksey müəllimin suala ironik formada “hamiləlik deyil ki, 9 aydan sonra nəsə gözləyək” cavabını verdiyini yazının əvvəlində qeyd etdim. Bu yerdə “Sumqayıt”ın baş məşqçisinin diqqətinə bir nüansı çatdırmaq istəyirəm. Biz tərəflərdə deyirlər ki, erkək qısırdısa, dişidən bala gözləməyə dəyməz. Heç ona süni mayalanma da kömək edə bilməz (bağışlayın, Baqanın yolu ilə gedirəm).

Aleksey müəllim ötən il dekabrın 30-dan Azərbaycandadı. İlk 6 ayda ona yetərincə kart-blanş verildi. Hamı “yeni gəlib, öz komandasını qurmayıb” deyərək, “Sumqayıt”ın zəif çıxışına görə göz yumdu. Deyəsən, Aleksey müəllim bundan ilhamlanaraq “onduz da söz deyən yoxdu, başımı aşağı salıb pulumu qazanım, arada da doğuş barədə mühazirə söyləməklə günümü keçirim” prinsipi ilə yola davam etməyi düşünür. Daha başa düşmür ki, “Sumqayıt”ı tarixində ilk dəfə bürünc medallara daşıyan baş məşqçini çıxardıb, onu “sükan arxasına” gətirən rəhbərliyi də pis vəziyyətdə qoyur, klub prezidentini qınaq obyektinə çevirir. Yeri gəlmişkən, bu həftənin cümə günü “Sumqayıt” Ayxan Abbasovun çalışdırdığı “Turan Tovuz”u qonaq edəcək. Maraqlıdı, “kimyaçılar” “Kapital Bank Arena”da“boz qurdlar”a uduzacağı halda Aleksey müəllim, görəsən, Riad Rəfiyevə nə bahənə gətirəcək? Özüm görsəm, deyəcəm, görməsəm, görənlər ona çatdırsın ki, bu dəfə heyvanlar aləminə baş vursun, onların doğuş prosesindən, hamiləlik dönəmindən danışsın. Ən yaxşısı camışlardan nümunə gətirməkdi. Axı camışlarda hamiləlik dövrü 10 ayı əhatə edir…

RƏŞAD