“Viktoriya” istisnasız müdafiə olunurdu, qazonun durumu pis idi, hakimin idarəçilik üslubu xırda follarla tempi salmaq istəyən rəqibə uyğun gəlirdi, qonaqlar “vaxt öldürmək” cəhdlərinə görə bir dəfə də cəzalanmadı, hədsiz azarkeş marağı “Qarabağ”ı gərginlik altında saxladı, meydana sonradan çıxan futbolçular keyfiyyət dəyişikliyinə səbəb olmadı, Stanek çox parlaq oyun göstərdi... – arzum və həvəsim olsa, onlarla belə dəlil sadalaya bilərəm.

Amma istəmirəm. Ona görə ki, bütün bunlar heç nəyi dəyişməyəcək. Ortada olan mənzərə budu ki, oyun qolsuz bitib və “Qarabağ” ardıcıl 4-cü dəfə mərhələnin taleyini cavab görüşündə həll etməlidi. Əslində qarşıdakı pley-off oyunu ətrafında yaranan durumu belə ifadə etmək daha yaxşı olar: “Ferentsavaroş” üzərində parlaq qələbənin şərtləndirdiyi ümummilli eyforiya yerini “birdən alınmadı...” tipli narahat-bezdirici düşüncələrə verib.

Gəlin əvvəlcə o məqamı özümüz üçün dəqiqləşdirək ki, Çempionlar Liqasının qrupunda oynamaq hər komanda, xüsusən də “Qarabağ” çapında olanlar üçün ad-san, nüfuz göstəricisi olmaqla yanaşı, həm də ciddi maliyyə mənbəyidi. Qrupa düşən komanda avtomatik 15,64 milyon avro (26,6 milyon manat) qazanır, bu məbləğ “Qarabağ”ın illik büdcəsindən də artıqdı.

Təbii ki, sıravi oxucu-azarkeş üçün “Qarabağ”ın 5 ildən sonra yenidən qrupa düşməsi daha önəmlidi. Elə mən də bu yöndə düşüncələrimi bölüşməyə həvəsliyəm. Prinsipcə faciəvi heç nə baş verməyib. Yəni “Qarabağ” əvvəlki üç mərhələdən ikisində də cavab görüşündə qələbəyə oynamalıydı. “Lex”ə 0:1 uduzub gəlmişdi, “Ferentsvaroş”la 1:1 edəndən sonra səfərə çıxdı və hər iki halda da hədəfinə çatdı. Yeganə istina “Sürix”lə dueldi, orda artıq səfərə qələbə ilə yollanmışdıq, bir top ehtiyatımız var idi. İndi isə elə vəziyyət yaranıb ki, sadəcə, uduzmamalı, ən pis halda oyunu penalti seriyasına daşımalıyıq (hərçənd o seriyanın taleyi ilə bağlı nikbin deyiləm), vəssalam-şüttamam. Amma bunu bacaracağıqmı?

Həlledici ola biləcək bir neçə məqam üzərində dayanmağa dəyər. Qurban Qurbanovun mətbuat konfransında səsləndirdiyi bu fikirlə tam razıyam: “Bizə ciddi yanaşırlar, “Qarabağ”dan ehtiyatlanırlar, meydanboyu futbolçularıma qarşı birəbir oynamağı tapşırırlar”. Azərbaycan çempionu əmsallar cədvəlinə görə bizdən irəlidə olan üç ölkənin çempionunu dizi üstə qoymaqla bəlli imic formalaşdırıb. Və budur, bizdən 12 pillə irəlidə olan ölkənin – Çexiyanın çempionu Bakıda hücuma yox, müdafiəyə üstünlük verir. Qurban bəy və köməkçiləri rəqibləri nə qədər inadla öyrənirsə, onlar da bizi o dərəcədə süzgəcdən keçirir, zəif cəhətlərimizi müəyyənləşdirir, məsələn, Zubir və Kadi kimi ustaları “oyundan qoparırlar”.

İkinci önəmli məqam: nəyə görəsə ölkəmizdə belə düşünürlər ki, “Viktoriya” cavab görüşündə azarkeş dəstəyinin, ya da hansısa başqa hissin təsiri altında Bakıdakı oyun üslubundan əl çəkəcək, hücuma çıxacaq, belədə topla oynamağı sevən “Qarabağ” da boş zonalar tapacaq. Təbii ki, mən bu variantın mümkünlüyünə inanmıram. “Viktoriya”nın “Qarabağ”la açıq oynaması dəlilik olar ki, paytaxtımızda çexlərin hərəkətlərindən hansısa psixi pozğunluq əlaməti sezmədik. Demək istədiyim odu ki, ağdamlılar “Ferentsvaroş”la səfər oyununda rəqibin gözləmədiyi halda dərhal hücum əməliyyatlarına başladısa, Plzendə eyni tərzi seçmək intihardı, özünəqəsddi və Qurbanov buna getməməlidi!

Fikrimcə, bütün avantürist addımlar rəqibi hücuma çıxarmağa hesablanmalıdı. O qədim məsəldə olduğu kimi: danış görüm, sən kimsən! Belədə ən böyük yük iki-üç variant fikirləşməli olan Qurban bəyin və Zubir, Kadi, Vaci, Almeyda kimi yaradıcı oyunçuların üzərinə düşəcək. Adamı nikbin olmağa vadar edən əsas məqam budu ki, “Viktoriya” “Qarabağ”dan üstün deyil. Amma “Qarabağ”, heç olmasa, bu dəfə üstünlüyünü maddiləşdirə biləcəkmi – bax, bu çətin sualdı.

Cavab görüşünün nəticəsi necə olur-olsun, “Qarabağ”ın itirəcəyi heç nə yoxdu. Əlbəttə, üç çətin rəqibi sıradan çıxarandan sonra qrupa vəsiqəni Çexiya çempionuna vermək istər-istəməz hamını ağrıdacaq. Mən bu məsələyə həm də “bütün arzuolunmaz seriyalar (çexlərlə duelləri nəzərdə tuturam...) bitməlidi”, necə deyərlər, “bütün pisliklərə ölüm” prizmasından yanaşıram. Ancaq konkret “Qarabağ”ın taleyinə “stəkanın boş tərəfindən” yanaşmaqda da fayda var. Baxın, bu komanda ötən mövsüm Konfrans Liqasının qrupundan pley-offa adladı, bu il daha səviyyəli turnirin - Avropa Liqasının qrupunu təminat altına alıb. Nə gizlədim, mən də çoxları kimi ÇL-in qrupundan ötrü sinov gedirəm, amma qismət AL-in qrupu olsa da, uzaqbaşı üzüləcəm, futbol təsərrüfatımızın gücünü, idarəçiliyi, başqa klubları nəzərə alıb, bir qədər ah-vay edəcəm...

HUŞƏNG