Azərbaycan premyer-liqasının 27-ci turunda keçirilən "Sabah" - "Sumqayıt" matçından (2:2) qonaq komandanın baş məşqçisi Aleksey Baqa jurnalistlərin suallarını cavablandırıb.

"Football-plus.az" xəbər verir ki, o, əvvəlcə görüşlə bağlı fikirlərini bildirib:

- Nəzərə almaq lazımdı ki, iki gün əvvəl "Qarabağ" la matçda ağır məğlubiyyət aldıq. Komanda həm fiziki, həm psixoloji cəhətdən düşmüşdü. Bu oyundan sonra bugünkü nəticə haqda ancaq xoş sözlər demək olar.

- Etiraf edə bilərsizmi ki, bu, yanvardan bəri "Sumqayıt"ın ən yaxşı oyunu idi?

- Rəqibimiz avrokuboklar uğrunda mübarizə aparırdı. "Qarabağ"a məğlubiyyətdən sonra özümüzü toparlaya bildik. Komandam xoş sözlərə layiqdi. Turnir cədvəlindəki yerimiz bəllidir. Buna baxıb, nəsə demək düzgün olmaz.

- Yeni mövsümlə bağlı müzakirələriniz olub?

- Kimin gedəcəyi, kimin gələcəyi ilə bağlı danışmaq lazım deyil. İnkişafla bağlı planlarımız var. Bu, toplanışlar və yeni transflerlərlə bağlıdı. Biz bütün oyunlara baxmalı, təhlillər etməliyik. Komandada bəzi müsbət dəyişikliklər var.

- Höccət və Vurğun tandemi özünü doğruldur. Bu barədə nə düşünürsüz?

- Müsbət dinamika var. "Şamaxı" ilə oyunda 3 xal qazanmışdıq. Bu dəfə də yaxşı nəticə oldu.

- Mətbuatda xəbərlər yayılır ki, komandadan ayrılmaq istəyirsiz. Buna münasibətiniz nədi?

- Dünən mənə bu xəbəri göstərdilər, gülümsədim. Orada yazmışdılar ki, 38 yaşlı mütəxəssis, amma mənim 41 yaşım var. Bu faktı görəndən sonra məlumatın necə yazıldığını başa düşdüm.