Uinston Çörçil

Rəşad Sadıqov baş məşqçi kimi avrokuboklarda debütündə uğursuzluğa düçar olmaqla yanaşı, layiqincə mübarizə aparmadı. "Makkabi" "Zirə"dən daha köklü, təcrübəli, güclü komandadı və buna heç kim şübhə etmir. Nə də qəsəbə təmsilçisindən israilliləri darmadağın edib mərhələ keçməyi tələb edən var idi. Amma “Zirə”sevərlər və bütün xalq komandadan hər iki matçda, əsasən də evdə meydanın hər qarışı uğrunda ölüm-dirim savaşı aparmağı, Təl-Əviv təmsilçisinə cəhənnəm yaşatmağı gözləyirdi. "Zirə" donanması isə doğma sahillərdə bombardmana məruz qaldı. "Dalğa Arena"da sanki meydan sahibi "Makkabi" idi, biz isə qonaq. Mərdəkandakı matçda 0:3 hesablı məğlubiyyət və qorxaq futbol Rəşad Sadıqovun "qartallar"ının iki mövsüm ərzində avtokuboklara qatılmaq üçün apardığı mübarizənin üstündən xətt çəkdi...

Millinin sabiq kapitanı "Zirə"nin “sükanı arxasına” keçərkən əsas məqsədin döyüşkən komanda formalaşdırıb, avrokuboka vəsiqə qazanmaq olduğunu açıqlamışdı. Azərbaycan futbolunun "Terminator"u 2020/21 mövsümündə komandasının mükafatçılar sırasına düşə bilməməsinin əsas səbəbini bir çox matçlarda hakimlərin qərəzli qərarları ilə izah etmişdi. Yola saldığımız mövsümün 23-cü turunda "Zirə" evdə "Səbail"i məğlub edəndən sonra mətbuat konfransında Rəşad bəyə sual ünvanlamışdım ki, hazırda 3-cü sıradasız. İkinci pilləni ələ keçirməyi planlaşdırırsız, yoxsa hazırkı mövqeyinizi qorumaqda maraqlısız?” Sabiq "14 nömrə"nin cavabı belə olmuşdu:



"Zirə" sona bir tur qalmış avrokuboklarda iştirakı, son oyunda isə bürünc medalları rəsmləşdirdi. Rəşad Sadıqovun və yetirmələrinin sevincinin həddi-hüdudu yox idi. Lakin Konfrans Liqasının 2-ci təsnifat mərhələsində rəqibin "Makkabi" olduğuna aydınlıq gələndə, "qartallar"ın sevinc aysberqi əriməyə başladı. Sadıqov özünü və yetirmələrini, oyuna 1 aydan çox vaxt qalmasına baxmayaraq, sanki məğlubiyyətin qaçılmazlığına kökləmişdi. Bu üzdən komandada özünəinam olduqca zəiflədi. Halbuki güclü rəqibə qarşı mübarizədə özünəinam, psixoloji cəhətdən motivasiya əsas silahdı. Özünəinamın sayəsində yaşıl meydanda zəif komandaların güclüləri məğlub edərək tarix yazdığını dəfələrlə görmüşük.

Sadıqovun ikinci böyük səhvi transfer siyasətində oldu. Ölkəmizi avrokuboklarda təmsil edən 4 komanda arasında “transfer bazarı”nda ən passivi "Zirə" oldu. Komanda heyəti mütləq yaradıcı hücumçu və müdafiədə etibarlılığı ilə seçilən futbolçu ilə gücləndirməliydi. Hələ bunun üzərinə qəsəbə təmsilçisi əsas “vuran ayağ”ı Davit Volkovu saxlaya bilmədi, kapitan Ağabala Ramazanov və start heyətinin üzvlərindən Ahmet Ayzayanı da yola saldı. “Zirə” onların əvəzinə Mirsayib Abbasov, Slavik Alxasov, Rüstəm Əhmədzadə və Rəhim Sadıxovu heyətinə qatsa da, yalnız sonuncunu uğurlu transfer saymaq olar. Maraqlıdı, qarşısına avrokuboklara vəsiqə qazanmağı hədəf qoyan Sadıqov mövsüm ərzində niyə transfer çalışmalarına yetərincə diqqət ayırmayıb, yalnız mövsüm bitəndən sonra axtarışa çıxdı? Rüstəm Əhmədzadəni daha tez komandaya cəlb etmək olmazdı? Gənc futbolçu Təl-Əviv təmsilçisiylə oyunda çox istəkliydi, reydlər edirdi, hətta gözəl qol da vurdu. Sadəcə, ofsayd onun sevincini gözündə qoydu. Millinin gənc üzvü nə qədər çalışsa da, oyun təcrübəsindən əziyyət çəkdiyi aşkar hiss olunurdu. "11 nömrə"ni çempionatın sonlarına yaxın "Zirə"yə cəlb etmək lazım idi. Bu yöndə çempionatımızdakı zəif büdcəsi, kasad heyəti ilə gözəl futbol sərgiləyərək uğurlar qazanan "Qəbələ" Sadıqova nümunə olmalıdı. Komanda zəif maliyyəsinə rəğmən, ilboyunca büdcəyə uyğun səviyyəli legionerlər axtarışındadı. Həmçinin bölgə təmsilçisi əsas futbolçularını saxlamaqla da heyətin özəyini qorudu. Həqiqətən də Elmar Baxşıyev və yetirmələri ancaq xoş sözlərə layiqdi.

Rəşad Sadıqovun 3-cü səhvi doğma meydanda "Makkabi"yə qarşı qorxaq futbol oynatması oldu. Təl-Əvivdə sərgilənən oyun bir daha göstərdi ki, "Dalğa Arena"da seçilən taktika yanlış idi. Yəni İsrail təmsilçisinə qarşı müdafiəyə qapanmaq yox, mərkəzdə çoxalaraq, top saxlayıb rəqibi yormaq və cinahdan sürətli reydlərlə müdafiəni yarmaq lazım idi. "Blümfild" stadionunda "qartallar" məhz bunu edərək rəqiblə başabaş mübarizə apardı. Bunun məntiqi davamı idi ki, təmsilçimiz həm baxımlı oyun, həm də nəticə qazandı. “Zirə” səfərdəki oyunu evdə nümayiş etdirsəydi, heç-heçə bir yana, hətta qələbə də qazanmaq olardı. Rəşad Sadıqovun Konfrans Liqasındakı uğursuzluğu "Karvan"ın 2006/07 mövsümündə UEFA Kubokundakı oyunlarını, daha doğrusu, özündən güclü Praqa "Slaviya"sı ilə qarşıdurmasını xatırlatdı. Komanda 1-ci mərhələdə heç kimin gözləmədiyi halda hər iki oyunda Slovakiya "Spartak"ını məğlub etdi. Yunis Hüseynovun yetirmələri ardınca doğma meydanda daha güclü "Slaviya" ilə qarşılaşdı. "Şəfa" stadionunda baş tutan matçda Yevlax təmsilçisi 0:2 hesabı ilə uduzsa da, çexiyalılardan çəkinməyərək açıq futbol oynayıb təhlükəli vəziyyətlət yaratdı. Hətta yüzfaizlik imkanlar da oldu. Çexiyada isə "Karvan" daha yaxşı oyun sərgilədi və matç qolsuz bitdi. Yekunda 2 yaşlı "Karvan" birəsrlik tarixə malik kluba qarşı mübariz çıxışı sayəsində azərbaycanlı azarkeşlərin rəğbətini qazandı. Məhz Yunis Hüseynovun sayəsində UEFA kubokunda ilk dəfə Azərbaycan təmsilçisi mərhələ keçdi. Aradan 16 il keçməsinə, "Zirə"nin tarixə qovuşmuş "Karvan"la müqayisədə daha yaxşı maliyə imkanlarına, infrastruktura, gücünə baxmayaraq, Konfrans Liqasındakı çıxışında inkişaf yox, tənnəzzül gördük. "Makkabi" nə qədər güclü olsa da (hərçənd keçilməz rəqib yoxdu), "Zirə" bu iki oyunda döyüşməliydi.

Böyük sənətkarımız, rəhmətlik Əjdər İbrahimovun lentə aldığı "26-lar" filmində hərbi komissar Qriqori Petrovun "sonra gec olardı" ifadəsi yada düşür. Məhz hərbi komissar general Biçeraxovun nə qədər mənfəətçil, şərəfsiz, satqın olduğunu çox gec anlayır. Petrov son anda generalı süngüylə öldürməyə çalışsa da, artıq gec olur, komissarın özünü güllələyirlər. "Makkabi"yə qarşı səfərdə sərgilənən oyun nə qədər yaxşı olsa da, Rəşad Sadıqov eynilə komissar Petrov kimi çox gecikdi...

ABDULLA İSMAYILOĞLU