İyunun əvvəlindən fəal transfer əməliyyatları aparan “Real” rəhbərliyi bu planda çalışmaları davam etdirir. “Kral klubu” gözlənilən iki transferi rəsmən açıqlayıb.

"Football-plus.az" xəbər verir ki, Bernardo Silvanın yeni klubu müəyyənləşib.

“Mançester Siti”dən ayrılan futbolçu karyerasını “Real”da davam etdirəcək. Portuqaliyalı yarımmüdafiəçi Madrid klubu ilə müddəti 2028-ci ilin iyununa qədər nəzərdə tutulan müqavilə imzalayıb. Sazişdə müddətin daha birillik uzadılma imkanı da yer alıb. Bernardo MS-də 2017-ci ildən oynayırdı. O, İngiltərə klubu ilə 451 matça çıxıb, 6 dəfə premyer-liqa, 1 dəfə Çempionlar Liqası, 1 dəfə UEFA Superkuboku, 2 dəfə ölkə kuboku, 1 dəfə Klublararası Dünya Çempionatı da daxil olmaqla ümumilikdə 19 kubok qazanıb.

“Real”la fransalı müdafiəçi İbrahima Konate arasında gözlənilən müqavilə də rəsmiləşib. Tərəflər arasında əldə olunan razılığa əsasən, 26 yaşlı futbolçu 2030-cu ilin yayına qədər Madrid klubunun formasını geyəcək. Hazırda Fransa yığması ilə dünya çempionatında çıxış edən İrahima son illər şərəfini qoruduğu “Liverpul”u azad agent kimi tərk edərək “Real” qoşulub.

İspaniya nəhəngi “Çelsi”nin futbolçusu Entso Fernandesi də transfer etməyə hazırlaşır. Məşhur jurnalist-insayder Nikolo Skiranın məlumatına görə, Madrid klubu argentinalı yarımmüdafiəçi ilə 6 illik müqavilə üzrə razılaşıb. “Real” futbolçunu transfer etmək üçün “Çelsi”yə böyük məbləğdə təzminat ödəyəcək. Bir müddət əvvəl yayılan xəbərlərə görə, “Çelsi” Fernandes üçün 138 milyon avro tələb edir.

Qeyd edək ki, 24 yaşlı yarımmüdafiəçi ötən mövsüm bütün turnirlərdə 54 matçda meydana çıxıb, 15 qol vurub və 7 məhsuldar ötürmə verib.