“Ötən mövsüm 2-ci liqanın debütantı ilə böyük həvəslə əməkdaşlığa başladıq. Lakin sorğu nəticələri bütün gözləntilərimizi alt-üst etdi. Ağstafada məlumatlılıq və maraq faizləti çox aşağı idi. Uzun fasilədən sonra insanların futbol izləmə vərdişini itirdiyini də hiss etdik. Klubun idarəetmə strukturu isə bir neçə fədakar şəxsdən ibarət idi. Bütün bunları nəzərə alıb, mövsüm üçün iki əsas məqsəd müəyyənləşdirdik: məlumatlılığı artırmaq və maliyyə kanalları formalaşdırmaq. Ümumi və oyun günü təbliğatı, oyun günlərinin təşkili, sahibkarlarla əlaqə və merçendayzinq satışı əsas iş istiqamətlərimiz oldu. Klubda əməkdaş çatışmazlığı olduğundan FİF tərəfindən bir nəfər əlavə işə götürüldü. Posterlər və bəzi kəndlərdə məlumat lövhələri quraşdırıldı, gənclərin marağını artırmaq üçün fanklub yaradıldı. Oyun günü təcrübəsini yaxşılaşdırmaq üçün "azarkeş səyahət xəritəsi" tətbiq edildi, “Bizon” ilə oyunlarda fanzona təşkil etdik. Bilet satışı maliyyə axını yaratmaqdan çox sistemi qurmaq və dəyəri qorumaq məqsədi daşıyırdı, əldə olunan vəsait ancaq xərcləri ödədi. (hər oyunda ortalama 98 bilet satıldı). Merçendayzinq üçün FİF kluba 100 ədəd oyun köynəyi ianə etdi. 25 manata satışa çıxarılan köynəklərdən cəmi 14-ü satıldı. Əldə olunan vəsait fanklub üçün bayraq, baraban və şərflərin alınmasına yönəldildi. Dövlət dəstəyi (aylıq 5800 AZN) xaricində yeganə ciddi maliyyə kanalı yerli sahibkarlardan formalaşdırdığımız "Biznes klub" oldu. "Əsədoğlu" market, "TezGəl" və "Şans" restoranları, "Arifoğlu" və "Ağstafa" inşaat mağazaları, "0222" taksi xidməti birlikdə aylıq 1600 manat təmin etdi. “Ağstafa Gəncləri” liqada qala bilməsəydi, görülmüş işlər yarımçıq qalacaqdı. Ən azı bu nəticəyə sevinmək lazımdır. Yuxarıdakı işlərin növbəti mövsüm daha çox faydasını görəcəyimizə inanıram”.