Mayın 30-dan, o bəd xəbər barədə ilk mesaj alınandan sonra Azərbaycanda ən çox müzakirə olunan klub “Turan Tovuz”du. 32 illik fasilədən sonra avrokuboklara vəsiqə qazanan tovuzluların sevinci gözündə qaldı. Bu komandanın Konfrans Liqasından uzaqlaşdırılması ətrafında o qədər çox xəbər, versiya yayılıb ki, gəl görəsən…

Təəssüf ki, Qərb klubu İdman Arbitraj Məhkəməsində (İAM) də qalib gələ bilmədi, bu qurum UEFA-nın qərarını təsdiqlədi. Bu isə o deməkdi ki, ölkəmizi Konfrans Liqasının (KL) yeni mövsümündə “Neftçi” ilə yanaşı, Misli premyer-liqasında 5-ci yeri tutan “Zirə” də təmsil edəcək.
“Turan Tovuz”un məlum cəzası bəlli olandan sonra “Zirə”nin adı bu mövzu ilə bağlı çox hallandı, iyunun 15-də İAM UEFA-nın qərarını təsdiqləyəndən sonra da bu klubun adını çəkənlər çoxdu. Faktiki əldə heç bir əsas, dəlil, sübut olmadan “qartallar” tənqid hədəfinə çevrilib. Guya ölkənin futbol qurumlarında “Turan Tovuz”un yox, məhz “Zirə”nin Konfrans Liqasında çıxış etməsini istəyən adamlar, qüvvələr var, məhz həmin sirli qüvvələr Bakıdan UEFA-ya “ötürmə verib” və s. və i.a. Xüsusən də “Zirə”nin baş məşqçisi Rəşad Sadıqov ən sərt ifadələrlə tənqid olunur, onun bacarıqsız olduğu deyilir.

Halbuki ortada olan faktlar göstərir ki, “Zirə”nin bu qərarla heç bir əlaqəsi yoxdu. Sadəcə, 2023-cü ildə “Turan Tovuz”un təhvil-təslim prosesi zamanı kimlərsə məsuliyyətsizik edib, klubun cəza dosyesi ilə maraqlanmayıb, 2019-da verilən bir qərarın gələcəkdə, yəni indi hansı fəsadlara yol açacağını hesablamayıb. Öz aramızdı, bunun Rəşad Sadıqova və ya “Zirə”yə nə dəxli?! “Zirə”, sadəcə, mövcud durumun hüquqi nəticəsindən faydalandı. Yəni “Turan Tovuz” KL-də iştirak edə bilmirsə, reqlamentə uyğun olaraq, növbəti pillədə qərarlaşan komanda, yəni “Zirə” avrokuboklara vəsiqə qazanır.

Rəşad Sadıqovun amansızcasına tənqid olunmasına nə deyəsən?! Azərbaycan futbolunun tanınmış simalarından biri olan Sadıqov həm futbolçu, həm də məşqçi kimi daim peşəkarlığı ilə seçilib. Onun belə münasibətə məruz qalması daha çox emosional yanaşmanın nəticəsidi. Bu hadisə bir daha göstərir ki, Azərbaycan futbolunda bəzən problemlərin kökü və məsuliyyəti yanlış ünvanlara yönəldilir.

“Zirə” bu prosesdə günahkar deyil, “Turan Tovuz”un durumundan faydalanan tərəfdi. Futbolda belə hallar olur, amma məsuliyyət daşıyan adamlar “Zirə”nin düşərgəsində deyil.

İSRAYIL XEYRULLAYEV

P.S. “Fatmagülün suçu nə?” serialına isə gərək baxım…