Yeni prezident “Səbail”i borclardan xilas etdi, Adil Şükürovla vidalaşdı
“Səbail”lə bağlı xeyli cavabsız sualdan bir neçəsinə bugünlərdə aydınlıq gəldi.
Bəlli olduğu kimi, Bayıl təmsilçisiylə bağlı hələ uzun müddət əvvəl xoşagəlməz iddialar yayılmışdı. Həmkarlarımız iddia edirdi ki, “dənizçilər” təxminən yarım milyon manat borca düşüb. Buna klubun 2025/26 mövsümü üçün planını ASCO-dan gələcək maliyyəyə arxalanaraq qurması, şirkət sponsorluq anlaşmasına xitam verəndən sonra maddi çətinliklərin artması səbəb olub. Sonradan klubun satılacağı və bölgələrdən birinə köçəcəyi haqda xəbərlər yayıldı. Gah Qusar təmsilçisi olacağı bildirildi, gah da Quba.
Hər halda, srağagün klubun yeni prezidentinin kimliyi açıqlandı. Məlum oldu ki, “Səbail”in yeni prezidenti klubun İdarə Heyətinin qərarına əsasən, Mirzə Bayrampur olacaq. Onun şəxsi “feysbuk” səhifəsinə baxanda görürük ki, 5 ildi “İMB Academy”də çalışır. Maraq üçün bildirək ki, bu şirkət ABŞ-də təhsil almaq istəyən tələbə və şagirdlərə xidmət edir.
Mirzə bəy ilk müsahibəsini AZƏRTAC-a verib. Sizi onun fikirləriylə tanış edirik:
“Hazırda “Səbail”də maliyyə vəziyyəti sabitdi. Güclü heyət formalaşdırmaq üçün çalışmalarımız davam edir. Qarşıya qoyulan əsas məqsəd çempionluq və premyer-liqaya yüksəlməkdi. Əvvəllər “Şimal”ı 2-ci liqadan 1-ci liqaya yüksəltmişəm. Ötən mövsüm isə “Şahdağ Qusar”da icraçı direktor vəzifəsində çalışmışam. Bu gün “Səbail”də premyer-liqa səviyyəsinə uyğun komanda formalaşdırmaq istəyirik. Bunun üçün həm təcrübəli, həm də perspektivli yerli futbolçuların cəlb olunması istiqamətində iş aparırıq. Baş məşqçi vəzifəsini Elnur Abdullayev icra edəcək. Həmçinin “ASCO Arena” və Quba şəhər stadionu ilə bağlı danışıqlar aparılır. Bu prosesdə AFFA ilə də müzakirələr davam edir. Quba stadionu ilə bağlı məsələlər müsbət həllini tapsa, klub fəaliyyətini həmin şəhərdə davam etdirəcək. Belədə komandanın adı dəyişdirilərək “Quba” olacaq. Əks halda, qarşıdakı mövsümdə ev oyunlarımızı “ASCO Arena”da keçirəcəyik. Bununla bağlı danışıqlar yekun mərhələdədi. Lakin plan növbəti mövsümdən etibarən “Quba” adı altında fəaliyyət göstərməkdi”.
Bu təyinatdan sonra klub baş məşqçi Adil Şükürovla yolları ayırdı. Təcrübəli mütəxəssis dünən "Football-plus.az" açıqlamasında bunları dedi:
“Səbail”lə vidalaşdıq. Keçirilən iclasda mən və klubun icraçı direktoru Firuz Abdulla iştirak etdi. Başqa şəxs olmadı. Hələ hansısa klubdan təklifim yoxdu”.
Əlbəttə, klubdakı fəaliyyətlərini davam etdirib-etdirməyəcəyiylə bağlı suala cavab tapmaq məqsədilə həm Firuz bəyə, həm də klubun mətbuat xidmətinin rəhbəri Rəşad Məmmədova müraciət etdik. Firuz bəy zənglərə cavab vermədisə, Rəşad bəy hələ klubdakı taleyi haqda məlumatlı olmadığını bildirdi.
Hər halda, bizə hadisələrin axarını izləmək, 10 ildi Azərbaycanın futbol səhnəsində olan klubun taleyinin necə olacağını görmək qalır. Axı birnəfəsə premyer-liqaya qayıdacağı gözlənilən “dənizçilər” 1-ci liqada başa çatan mövsümü 3-cü pillədə tamamladı.
KƏNAN BAHADIR
Digər xəbərlər
