Məlum olduğu kimi, avrokuboklarda 1-ci və 2-ci təsnifat mərhələlərinin püşkü atılıb. Bu isə o deməkdi ki, təmsilçilərimizin də rəqibləri bəllidi.

İndi klubların əsas öhdəliyi həmin oyunlara ən yüksək səviyyədə hazırlaşmaq və futbol ictimaiyyətinə qələbə sevinci bəxş etməkdi. Ancaq bu dəfə ənənəvi mənzərənin – ilk bir neçə mərhələdən sonra “Qarabağ”ın meydanda tək qalmasının şahidi olmaq niyyətində deyilik. Qarşınıza istər özümüz, istərsə də azarkeşlər adına böyük arzu və tələblərlə gəlmişik, əziz təmsilçilər!

“Sabah”ın xeyir, Çempionlar Liqası!
Xatırlayırsızsa, ötən mövsüm Avropa Liqasında debüt edən “Sabah” haqda yazını da yuxarıdakı başlıqla təqdim etmişdik. Ancaq göründüyü kimi, “bayquşlar” artıq ən mötəbər avrokubok turnirində çıxış edəcək. Bu o deməkdi ki, kollektiv ildən-ilə daha böyük uğurlara imza atır.

Hər halda, komandanın ölkə daxilində qazandığı nəticələri Avropa meydanlarına daşımasının vaxtı çatıb. Öz aramızdı, bu gün “Sabah”ın nəinki Konfrans, hətta Çempionlar Liqasının əsas mərhələsinə vəsiqə qazanmasını arzulamaq sadəlövhlük olmaz. Sadəcə, burda növbəti mərhələlərdəki rəqiblərin səviyyəsini nəzərə almağa məcburuq. O başqa məsələ ki, Masazır təmsilçisi həm “Nyu Seynts”i, həm də “Vardar”/KuPS cütünün qalibini mübarizədən kənarlaşdırmağa qadirdi. Əlbəttə, bunun əksini iddia edənlər tapılacaq. Amma “Sabah”ın maliyyə durumu, istər başa çatan mövsümün əvvəlində, qış fasiləsində, istərsə də, bugünlərdə heyətinə cəlb etdiyi futbolçuların sayı və keyfiyyəti, baş məşqçi Valdas Dambrauskasın avrokubok təcrübəsi, klubun imkanları rəqiblərlə müqayisədə yetərincə üstündü.

Ümumiyyətlə, püşkatmada “Sabah”ın bəxtinin gətirdiyini deyə bilərik. Odu ki, srağagündən etibarən Tirolda toplanışa başlayan komanda hazırlıq prosesindən maksimum faydalanmalı, tarixində ilk dəfə çıxış edəcəyi yarışda irəliləməyin yollarını tapmalıdı.

Yenilənən “Qarabağ” və Avropa Liqası...
“Qarabağ”ın Avropa Liqasıyla bağlı son təəssüratı ürəkaçan deyil. Ona görə ki, ağdamlılar 2024/25 mövsümündə bu turnirin əsas mərhələsində çıxış etdi və bu mərhələni sonuncu sırada başa vurdu. Ancaq ruhdan düşməyən “köhlən atlar”ın növbəti “futbol ili”ndə Çempionlar Liqasının əsas mərhələsində tarix yazdığını, nə az, nə çox - 10 xal topladığını bilirik. Bu üzdən, Qurban Qurbanovun komandasından gözləntilər böyükdü. İş ondadı ki, mütəxəssis heyəti böyük ölçüdə təkmilləşdirmək niyyətindədi. Ayrılıqlardan və yeni gələn oyunçuların varlığından xəbərdarsız. Əlbəttə, belədə “Qarabağ”ın ilk başda çətinliklərlə üzləşmək ehtimalı böyükdü. Lakin Qurban bəyin təcrübəsi və heyətin tam yenilənməyəcəyini, 1-ci təsnifat mərhələsindəki rəqibin – İslandiya “Vestri”sinin “köhlən atlar”la müqayisədə xeyli zəif olduğunu gözardı etməməliyik. Görünür, “köhlən atlar” ardıcıl 13-cü dəfə avrokubokların əsas mərhələsində çıxış etmək şansına malikdi və bu amal uğrunda döyüşməyə dəyər!

Konfrans Liqasının əsas mərhələsi üçün daha iki şans...
Heç şübhəsiz, bu yarışda iştiraka hazırlaşan “Neftçi” ilə “Zirə”nin əsas mərhələyə vəsiqə qazanması klublarımızın avrokuboklar tarixində növbəti önəmli uğuru olar. Ancaq etiraf edək ki, bu yöndə şans azdı. Konfrans Liqasında çıxış edəcəyini hələ bu həftə öyrənən “qartallar”ın heyəti ayrılıqlardan sonra böyük ölçüdə zəiflədi. Bəli, “Zirə” dərhal yeni transferlər edə, daha iddialı komanda formalaşdırmağa başlaya bilər. Lakin maliyyə durumu, vaxt azlığı kimi məqamlar “qartallar”ın əleyhinə işləyəcək. Bu gün kollektiv ən yaxşı halda pley-off mərhələsinə qədər irəliləyə bilər ki, bu da çətin görünür. Yenə də istənilən durum “Zirə” üçün bəhanə olmamalıdı. “Qartallar” dərhal planları dəyişməli və iş başına keçməlidi. Burda həm də çox şey məhz Rəşad Sadıqovdan, onun bilik və bacarıqlarından asılıdı. Təcrübəli mütəxəssis özünü sübut etmək üçün ələ düşən fürsətdən maksimum yararlanmağa, başa çatan mövsümdə qeydə alınan uğursuzluqları unutdurmağa səy göstərməlidi. Əlbəttə, o, bu yolla 6 ildə “Zirə”də iş başında olsa da, kubok qazana bilmədiyi haqda reallığı kölgədə qoya bilər.

“Neftçi”yə gəlincə, burda hansısa çatışmazlıqdan söhbət gedə bilməz. Yuri Vernidubun çalışdırdığı komanda əzmkarlığı və yaradılan şərait sayəsində Konfrans Liqasında çıxış etmək hüququna yiyələndi. Hazırda geriyə yol yoxdu. İki ildi avrokuboklara vəsiqə qazana bilməyən “ağ-qaralar” yeni mövsümdə azarkeşlərini daha böyük uğurlarla sevindirməyə məcburdu. Axı sadiq tərəfdarlar da bu xoşbəxtliyi haqq edir. Həmçinin paytaxt təmsilçisi büdcəsinə görə premyer-liqada liderlər sırasındadı. Bu baxımdan, imkanlardan istifadə etmək, əvvəlki “futbol illəri”ndə yaşanan problemləri unutdurmaq çətin olmamalıdı. O başqa məsələ ki, “Neftçi”nin heyətinin gücləndirilməsinə hava-su kimi ehtiyac var.

Yazılanlardan belə nəticə hasil olur ki, klublarımızın ilk təsnifat mərhələlərində mübarizəni dayandırmağa haqqı çatmır. İrəliləmək, xüsusən əsas mərhələyə vəsiqə qazanmaq başlıca şərtdi. Hazırda bəlli olan istər konkret, istərsə də potensial rəqibləri mübarizədən kənarlaşdırmaq nə “Sabah”, nə “Qarabağ”, nə “Neftçi”, nə də “Zirə” üçün elə də ciddi sınaq deyil. Gün kimi aydındı ki, hər biri münasib rəqiblərlə qarşılaşacaq. İlk mərhələlərdə qazanılacaq uğur və motivasiya isə təbii ki, yola davam etmək üçün yanacaq rolunu oynayacaq. Odu ki, iş başına! Borcunuzu ödəyin! Axı son illərdə bəxtimizə belə münasib rəqiblər düşməmişdi...

Sizə uğurlar, bizə isə xoş seyrlər!

KƏNAN BAHADIR