"Mərhələ iki oyundan ibarətdi, hər şey baş verə bilər" - Valdas Dambrauskas
"Sabah"ın baş məşqçisi Valdas Dambrauskas Çempionlar Liqasının 1-ci təsnifat mərhələsinin püşkünü dəyərləndirib.
"Football-plus.az" xəbər verir ki, püşkə əsasən, paytaxt təmsilçisi Uels "Nyu Seynts"i ilə qarşılaşacaq. Mütəxəssis klubun mətbuat xidmətinə açıqlamasında rəqibləri haqda müsbət fikirlər səsləndirib.
"İlk növbədə düşünürəm ki, hər rəqibə hörmətlə yanaşmaq lazımdı. "Nyu Seynts" dəfələrlə Uels çempionu olmuş, Avropada tanınan komandadı. Onlar 10 ildən artıqdı ki, daxili çempionatda dominantlıq edirlər. Necə oynamağınızdan, hansı futbolu sərgiləməyinizdən asılı olmayaraq, əsas məsələ mentaliletdi. Hər matçda qələbə qazanmaq üçün çıxmalısan. Bu da göstərir ki, hər bir rəqibə hörmət etməli, özünü ən yaxşı şəkildə hazırlamalısan".
O, rəqibin kimliyinin əhəmliyyətli olmadığını deyib:
"Püşk ikinci dərəcəli məsələdi. Hansı rəqibin düşməyi o qədər də önəmli deyil. Ən vacib məqam bizim necə hazırlaşacağımız, hansı formada olacağımız, nə qədər istəkli və intizamlı davranacağımızdı. Çünki rəqibin kimliyindən asılı olmayaraq, özünü yaxşı hazırlayan hər kəs futbol oynamağı bacarır. Artıq bütün komandalar futbol oynamağı bilir. Bəlkə də bu, çox sadə səslənir. Mərhələ iki oyundan ibarətdi. Hər şey baş verə bilər".
Dambrauskas hazırda təlim-məşq toplanışına kökləndiklərini söyləyib:
"İndi etməli olduğumuz əsas şey bu təlim-məşq toplanışına istəkli, düzgün yanaşma illə başlamaqdı. Ən yaxşı səviyyədə hazırlaşmalı, yoxlama matçları keçirməli, oyun üslubumuzu yeniləməliyik. Öz oyunumuza yeni komponentlər əlavə etməliyik. Məncə, sən yaxşı hazırlaşsan,nəticələr özü gələcək".
Xatırladaq ki, Çempionlar Liqasının 1-ci təsnifat mərhələsinin oyunları iyulun 7-8-i və 14-15-də baş tutacaq.
Digər xəbərlər
