Sənan Qurbanov: “Bu mütəxəssis eyni zamanda çox güclü psixoloqdu” – AÇIQLAMA
Üç gün öncə Çempionlar Liqasının final matçını izlədik.
“Real” yenə də qitənin ən nüfuzlu klub turnirinin qalibi oldu. Final matçında “Liverpul”u 1:0 hesabı ilə yenən komanda 14-cü dəfə bu titula yiyələndi. Bu göstəricidə ən yaxın izləyicisi “Milan”dan iki dəfə öndə olan “Kral klubu” sanki ÇL-in kubokunu qazanmağı vərdiş halına çevirib. Heyət, baş məşqçi dəyişikliyi olsa da, “Real” yenə bu mükafatı qazanır.
Əksəriyyət Ronaldodan, Zidandan sonra “Real”dan “əlini üzmüşdü”. Lakin komanda “Kral klubu” olduğunu hər addımda sübut etməyə davam edir.
Madrid təmsilçisinin bu dəfə də Çempionlar Liqasının qalibi olması artıq bu düşüncəni formalaşdırdı. ÇL-də qalib olmaq bu klubun qanındadı.
Görəsən, “Real” belə nə qədər davam edəcək? Bu komandaya rəqib ola biləcək bir klub yoxdu? Komandanın rekord sayda Çempionlar Liqası kubokunu qazanmasının sirrini Sənan Qurbanovdan öyrənməyə çalışdıq. Mütəxəssisin “Football-plus.az” saytına açıqlaması belə oldu: “Real” artıq Çempionlar Liqasının 14 qat qalibidi. Karlo Ançelotti demişkən, elə bil formada sehr var. Bu klubun tarixi sözünü deyir. Eyni zamanda təcrübə hesabına da çox şey edir. Ronaldo olsa da, olmasa da, bu kollektiv bütün titulları qazanmağı bacarır. Zidandan öncə və sonra bir az uğursuzluq yaşandı. Amma sonra komanda yenə də tempi tutdu, kuboklar qazandı və tarixi klub olduğunu göstərdi. Yarımfinalda çox adam Xosep Qvardiolanın dönüş yaradacağını gözləyirdi. Amma o bu işin öhdəsindən gələ bilmədi. Belə görünür ki, Ronaldonun “Real”dan getməsi, Mbappenin gəlməsi elə bir əhəmiyyət kəsb etmir. Sadəcə, indi Rodriqo, Vinisius forma yığır. Bütün bunlar da bu komandanın böyük klub olduğunu göstərir, “Real”da inkişaf davam edir. Burda əsas rol oynayan amillərdən biri də seçim idi. Ançelottinin yerinə başqa məşqçi gəlsəydi, bu futbolçulara inanmazdı. Görünən odu ki, bu mütəxəssis eyni zamanda çox güclü psixoloqdu. Gənc futbolçular ona görə meydanda çox istəkli görünürlər. Yadıma gəlir, Vinisius qol vura, ötürmə verə bilmirdi. Amma indi hər ikisnin öhdəsindən gəlir. Bu da sırf inama görədi. Baş məşqçinin güclü psixoloq olması buna səbəbdi. Vinisius da, Rodriqo da həlledici məqamlarda ortaya çıxdılar. Bunda da böyük ölçüdə baş məşqi amili rol oynayır. Bəlkə də biz kənardan çox şeyi görə bilmirik. Məsələn, “Liverpul”u inanılmaz pressinq edən bir komanda kimi tanıyırıq. Təhlil etmək də çox çətin deyil. “Kral klubu”nda bəlkə də bunları görə bilmərik. Oyun gah alınır, gah da yox. Amma görünən odu ki, tarixi klubdu, məşqçi psixoloqdu. Ulduz futbolçularla çox yaxşı dil tapmağı bacarır. Gənc futbolçulara da inam aşılayaraq inanılmaz bir komanda yaradıb. Ona görə də öncə ölkə, sonra isə Çempionlar Liqasının qalibi oldular. Ən əsas da “Mançester Siti” və PSJ ilə oyunda dönüş yaratdılar. Bu da sırf futbolçuların inamına görə oldu”.
Maraqlıdı, mütəxəssis növbəti mövsüm Madrid klubuna hansı komandaların “əlcək atacağını” düşünür: “Yenə də “Liverpul” və “Mançester Siti” rəqib ola bilər. Buna onların büdcələri də imkan verir. “Barselona”nın toparlana biləcəyi hələ sual doğurur. “Milan”ı da çox istəyirik ki, Çempionlar Liqasında sözünü desin. Amma açığı, bu real görünmür. Düzdü, ölkə çempionu oldular, amma ÇL-də qələbə üçün “Milan”ın nə dərəcədə hazır olduğunu deyə bilmərəm. Klubun büdcəsindən də çox şey asılıdı. Əslində yaxşı komanda formalaşdıra biliblər. Orda da baş məşqçi psixoloqdu. Futbolçularla dost olmağı bacarır. Yeni mövsümdə “Milan”ı ən azı 1/4 finalda gözləyirik. Transfer işində daha fəal olsalar, düşünürəm ki, bu komanda da ÇL-də “Real”a rəqib ola bilər”.
ŞAİR ABDULLA
Digər xəbərlər
