“Azarkeş təhqir edir, qollarını qandalla, stadiondan çölə çıxar” - ÖZƏL AÇIQLAMA
Ötən həftənin cümə günü AFFA İntizam Komitəsi maraqlı qərarlar verdi.
Təbii ki, hadisələrin əksəriyəti 1-ci divizionda yaşanmışdı. Qurum “Kəpəz”i azarkeşlərinin plakat açmasına görə cəzalandırıb. Bununla bağlı detalları diqqətinizə çatdırmışıq. AFFA İntizam Komitəsinin cəzalandırdığı klublardan biri də “Zaqatala”dı. Bölgə təmsilçisi 21-ci turda “Qəbələ-2”ni 5:1 hesabıyla darmadağın edib. Amma azarkeşlər meydana kənar əşyalar atıldığına görə klub 160, kütləvi şəkildə təhqiramiz ifadələr işlədildiyinə görə isə 400 manat cərimələnib.
Komanda böyükhesablı qələbə qazanıbsa, futbolsevərlər nəyə etiraz ediblər? Hansı səbəbdən klubu ziyana salıblar? Suallarımızı “Zaqatala”nın çalışdırıcısı Rüstəm Məmmədova ünvanladıq: “Meydana yad əşya atılmışdı. Bunu hamı gördü. Balaca, əzilmiş enerji içkisi butulkası atıldı. Amma orda tam əmin ola bilmədik ki, meydandakılardan kiməsə atıldı, yoxsa əldən düşdü. Çünki hesab da o deyildi. Biz qələbə qazanırdıq, matçın da son dəqiqələri idi. Hakimliklə də bağlı hansısa problem yox idi. Oyunu super idarə etdilər. Mən hansısa nöqsanlarını görmədim. Rəqib də dostlarımız, qardaşlarımızdı. İnanmıram, onlardan da kimsə nəsə etsin ki, azarkeşlərimiz qıcıqlansınlar. Dəmirin düşdüyünü gördüm. Lakin inanmıram ki, kimsə bilərəkdən etsin. Təhqir məsələsi isə mənə də maraqlı oldu. Yenə deyirəm, hesabda irəlidəydik. Mən orda kiminsə təhqir olunduğunu eşitmədim. İndi ola bilər ki, hansısa içkili, ya sa ağlı başında olmayan biri stadionda söyüş söyüb. Buna görə klubun cərimələnməsi nə dərəcədə doğrudu? Bütün dünyada azarkeşlər kimlərisə təhqir edir. Buna görə klublar cərimələnir? İngiltərədə, Türkiyədə nələr deyilir. Bu qanun, deyəsən, təkcə bizdədi ki, azarkeşlər söyür, klub cərimələnir. Mən futbol tarixində belə şey görməmişəm. Azarkeş təhqir edir, qollarını qandalla, stadiondan çölə çıxar, getsin. Daha klubu niyə cərimələyirsən? Rəsmi şəxs kimisə təhqir etməyib ki... Mən görmədim ki, azarkeşlər kimisə söysün. Çox güman, AFFA nümayəndəsi bunu qeyd edib. Onunla görüşəndə soruşacam ki, nə üçün bizim klub cərimələnib?”
Divizionda 22-ci tura start verilib. “Zaqatala” bu gün səfərdə “Qaradağ Lökbatan”ın qonağı olacaq. Rüstəm Məmmədov bu görüş haqda da fikirlərini bölüşdü: “Rəqib görüşün aşkar favoritidi. Çox yaxşı komanda formalaşıb. Onlarla oyunumuz çox maraqlı alınır. Həqiqətən də normal futbol nümayiş etdirən komandadı. Turnir cədvəlindəki mövqeləri də göz qabağındadı. Bizim komandada zədəlilər var. Buna görə az da olsa, problem yaşayırıq. Binədəki meydan da yaxşı deyil. Ora xoşumuza gəlmir. Həmin stadionda oynayanda bizim uşaqların bir neçəsində mikro-zədələr yaranır. Lökbatanın meydanı da yaxşı vəziyyətdə deyil. Elə orda da oynayanda həmişə 3-4 futbolçumuz sıradan çıxır. Amma bu, bəhanə ola bilməz. Biz həmişə qələbə üçün meydana çıxmışıq. İndi də elə olacaq. Komandanı oyuna əla kökləmişik, hazırlığımız normaldı. Rəqibin “Qaradağ Lökbatan” olmasında heç bir problem yoxdu”.
İLKİN SULTANLI
Digər xəbərlər
