Rauf Cabbarovu "yıxıb-sürüdü" - AÇIQLAMA
Dünən AFFA-nın İntizam Komitəsinin iclası keçirilib.
“Qəbələ” – “Sumqayıt” oyununda meydan sahiblərinin azarkeşləri tərəfindən kütləvi şəkildə təhqiramiz ifadələr işlədildiyi üçün Qəbələ təmsilçisi 4000 manat cərimələnib. Meydana kənar şəxs daxil olduğu üçün meydan sahibi klub daha 1600 manat ziyana düşüb. Komandasını ziyana salan "Red Black Army"nin bununla bağlı fikirlərini aldıq. Görəsən, azarkeş qrupu niyə belə bir addım atıb? Sualımızı fanklubun rəhbəri Nəriman Mahmudova ünvanladıq:"AFFA yenə öz ampluasındadı. Hamısı "Qəbələ"ni yıxmaq üçündü. Biz bu qərarla o zaman razılaşa bilərdik ki, azarkeş təhqiramiz ifadəni boşuna işlətsin. Burdan AFFA-ya səslənirəm. Dünyanın hansı ölkəsində belə bir qayda var ki, azarkeş tribunada söyüş söyə bilməz. Bu qanun harda var? Nümunə kimi Türkiyə futbolunu göstərə bilərəm. Orda bəstələrin 90 faizi təhqirdi. Bu futboldu. Burda maraq, rəqabət var. Buna görə heç kim heç nə deyə bilməz. Azarkeşilərin söyüş söyməsinə görə 4000 manat cərimələyirlər. Bəs Rauf Cabbarov necə cəzalanıb? Cəzalanmayıbsa, ona qarşı ifadələr işlədilib deyə klub niyə cəzalanır? O, epizod aşkar penalti idi. UEFA-dan mütəxəssislər gətirib soruşsunlar. Penalti deyildisə, açıqlamasını versinlər. Penalti idisə, verilməyibsə, hakim cəzalanıbmı? Hakim cəzalanmayıbsa, klub niyə cəzalanır? Biz komandaya ziyan vurduğumuzu düşünmürük. Çünki biz "Qəbələ" sevdalılarıyıq. Heç vaxt bilərəkdə kluba zərər vurmarıq. Klubumuzun ən pis və ən yaxşı vaxtında həmişə yanında olmuşuq. Rəhbərlik də hər görüşdə bildirir ki, "klubun arxa-dayağı sizsiz. Biz sizə çox inanırıq". Raufun kənarda qalması və klubun cəzalanması bir daha AFFA-nın ədalətsizliyinin sübutudu. Hakim özü məcbur etdi ki, onu söysünlər. Çünki ədalətsiz qərar verdi. Azarkeşlər də, təbii ki, özlərini saxlaya bilmədi. 2 xalımızı "yedkilərinə" görə ən azı çıxıb üzr istəməliydilər. Axı bizim o xallara ehtiyacımız var idi. Bir sözlə, bu, İntizam Komitəsinin absurd qərarlarından biri oldu".
GÜNAY VƏLİYEVA
Digər xəbərlər
