“Özümüzü yuxarı qalxmağa fokuslamışıq” – NAİL KƏRİMOV
Konfrans Liqasına vəsiqə qazanmağa çalışan “Qəbələ” artıq 5 turdu qələbəyə həsrət qalıb.
Bir ara hətta ikinci pillədə qərarlaşan “qırmızı-qaralar” turdan-tura geriləyir ki, bu da hazırda 5-ci pillədə qərarlaşan “Sabah”ın işinə yarayır. Premyer-liqanın 22-ci turunda autsayder “Səbail”ə məğlubiyyət bölgə təmsilçisinin durumunu daha da qəlizləşdirib. Artıq “Sabah”la aradakı xal fərqi 2-yə enib və bu da o deməkdi ki, qarşıdakı turlarda növbəti yenilgi “Qəbələ”ni avrokubok zonasından uzaqlaşdıra bilər.
Komandanın baş məşqçisi Elmar Baxşıyev hər nə qədər yetirmələrinin “qara zolağ”a düşmədiyini söyləsə də, real durum fərqli mənzərədən xəbər verir. Nə baş verir, uzun müddət ilk “üçlük”də qərarlaşan kollektiv niyə son matçlarda özünə bənzəmir? Bu sualı klubun idman direktoru Nail Kərimova ünvanladıq: “Bəli, artıq 5 oyundu ki, komanda qələbə qazana bilmir. Xüsusilə “Keşlə” və”Səbail”lə görüşlərdəki xal itkiləri yersiz oldu. “Keşlə” və “Zirə” ilə matçlarda komanda yaxşı oyun sərgiləmişdi. Iki qarşılaşmada top 6 dəfə dirəkdən və tirdən dönüb. Sənan Qurbanovun çalışdırdığı kollektivlə matçda 8 yüzfaizlik qol vəziyyətindən istifadə olunmayıb. Həmin görüşdə rəqibin bir imkanı olub və ondan da yararlanıb. “Neftçi” və “Qarabağ”a uduzduğumuz matçlarda belə normal oynamışdıq. “Səbail” ilə görüş istisna oldu. Bəlkə də mövsümdə ən zəif oyunmuz oldu. Açığı, rəqibdən belə motivasiyalı çıxış gözləmirdik ki, bəlkə də bu biz tərəfdən bir yanlışlıq idi. Bunu nəzərə almalı, öncədən görməliydik. “ASCO Arena”nın qazonunun vəziyyəti də yaxşı deyildi. Bizim komanda təbii ota öyrəşdiyindən futbolçularımız süni örtükdə istədikləri kimi çıxış edə bilmədi. Üçüncü məqam kimi də hakimliyi qeyd edə bilərəm. Bu fikirlər artıq bir neçə yerdə səslənib. Söhbət matçın nəticəsinə birbaşa təsir edən hakim səhvlərindən gedir. Qapımıza vurulan birinci qol zamanı oyunçumuza qarşı qayda pozulur, ancaq fit səslənmir. 50-ci dəqiqədə cərimə meydançasında top rəqibin əlinə dəysə də, hakim davam işarəsi verir. Həmin an penalti təyin olunmalı idi. Hesab 1:1 olandan sonra oyunun gedişatı dəyişə bilərdi. Bunların heç birini bəhanə kimi qəbul etməyin. Sadəcə, reallığı dilə gətirdim. “Səbail”ə qarşı həqiqətən zəif oynadıq. “Keşlə” ilə matçda xal itirsək belə, kollektiv ümidverici oyun sərgiləmişdi. Bu üzdən narahatlığımız yox idi. Ancaq son matçdan sonra narahat olmağa başladıq. Artıq hər şey geridə qalıb. Hamımız, içi mən qarışıq növbəti qarşılaşamaya hazırlaşırıq. “Sumqayıt”la görüş bizim üçün həlledici matçlardan biri olacaq”.
Qış fasiləsindən sonra çoxları “Qəbələ”nin sonadək tempi qoruyub saxlaya bilməyəcəyini deyirdi. Səbəb kimi də heyətin kasad olması göstərilirdi. Nail bəy bizimlə söhbətdə bu məqama da toxundu: “Heyətimizin kasad olması faktdı. Bu məqamı xüsusi qabartmağa ehtiyac da görmürəm. Fernan Lopes və İsnik Alimi “Keşlə” ilə matçı buraxırdı. “Səbail”lə görüşdə də Fernan və cəza səbəbindən Ruan Renato iştirak etmirdi. Omar Haninin də yalnız oyundan əvvəlki məşqə çıxdığını nəzərə alsaq, itkilər komandanın çıxışına təsir göstərir. 15-16 futbolçu ilə yola davam edirik. “Sumqayıt”la qarşılaşma da istisna olmayacaq. Bu tur kapitanımız Asif Məmmədov cəza səbəbindən meydana çıxmayacaq. Ümumiyyətlə, ikinci dövrə başlayanda belə problemlərin olacağını bilirdik. Qış fasiləsindən sonra ilk görüşdə Renatonun “qırmızı”sı olduğuna görə heyətdə yox idi. Daha 7 oyunçumuz isə 4-cü “sarı” astanasında idi. Turlar ötdükcə onların cəzalı duruma düşəcəyi gözlənilən idi. Sadaladığım məqamlar bizə əsas vermir ki, geri çəkilək. Taleyimiz öz əlimizdədi. Hələ də avrokubok zonasındayıq. Hamı nədənsə 5-ci pillədəki komanda ilə xal fərqinin 2-yə bərabər olduğunu qabardır. Onu da deyim ki, 3-cü pillədəki “Zirə”dən 2 xal geri qalırıq. Hamı bizə aşağı yuvarlanmaq təhlükəsi olduğunu söyləyir. Biz isə əksinə, özümüzü yuxarı qalxmağa fokuslamışıq və bu niyyətlə də yola davam edəcəyik”.
RƏŞAD
Digər xəbərlər
