Premyer-liqanın 22-ci turunun ilk oyunu Şamaxıda keçirildi.1992-ci ildən bəri ilk dəfə qədim Şirvanşahlar dövlətinin paytaxtı böyük futbola qucaq açdı.
Şənbə günü rayonun eyniadlı komandası ölkənin flaqmanı “Neftçi”ni qonaq etdi. “Şamaxı” tribunları dolduran azarkeşləri sevindirmək üçün çox çalışdı, hətta erkən qol sayəsində 1-ci hissəni qalib başa vurdu. Rəhman Hacıyev cərimə zərbəsini mükəmməl yerinə yetirməklə baxımlı qola imza atdı. Ancaq ad dəyişikliyi səviyyəni yüksəltmir. Məğlubiyyətlə barışmayan qonaqlar fasilədən sonra oyun planında ciddi dönüş etməyi bacardı. Saatın tamamında tarazlığı bərpa edən bakılılar bir neçə dəqiqə sonra hesabda önə çıxmaqla kimin kim olduğunu ortaya qoydu. Azarkeşlərin baxımlı oyuna şahidlik etdiyini söyləmək olmaz. Sadəcə, dolu tribunalar möhtəşəm ab-hava yartmışdı ki, belə mənzərəni, adətən, avrokuboklarda görmək mümkündü.
Murad Musayevin çalışdırdığı “Sabah”, deyəsən, kubokun 1/4 finalında "Neftçi" ilə qarşılaşmalarda yaşanan psixoloji sarsıntıdan çıxıb və yenidən bütün rəqiblərini məğlub etməyə başlayıb. “Zirə” ilə matçda qazanılan 3 xal “ağ-göylər” üçün ardıcıl üçüncü oldu ki, bu da sözlərimizi təsdiqləyir. “Qartallar” isə bu məğlubiyyətlə vəziyyətini nəzərəçarpan dərəcədə çətinləşdirdi. Rəşad Sadıqovun komandası yetərincə yaxşı oynadı. Amma heyətdəki ciddi itkilər və oyun planında bəzi çatışmazlıqlar qəsəbə təmsilçisi üçün xoşagəlməz sonluğu qaçılmaz etdi. Həmçinin bu görüş bombardirlər siyahısında yer alan Volkovla Mikelsin dueli kimi yadda qaldı. “Qartallar”ın gürcü hücumçusu 10 qolla bombardirlik yarışına başçılıq etsə də, 2022-də fərqlənə bilməyib. Volkov “10”da “ilişib” qaldığı halda, “tələbələr”ın alman vingeri bu görüşdə də fərqlənməklə qol sayını 9-a çatdırdı. Yeri gəlmişkən, “Zirə” son 4 oyunda qələbəyə həsrət qalıb ki, bu matçların ikisində yenilib, ikisində bərabərliyə razılaşıb. Çempionatın belə həssas məqamında büdrəmək sonda komandaya baha başa gələ bilər.
Heç də yaxşı günlərini yaşamayan “Sumqayıt”ın evdə “Qarabağ”dan xal alacağı inandırıcı görünmürdü ki, məhz belə də oldu. Qurban Qurbanovun komandası baş məşqçinin 50 illik yubileyinə qələbə bağışladı. “Qarabağ” həmçinin avrokuboklara vəsiqə təmin etdi.Aleksey Baqanın çalışdırdığı “kimyaçılar” isə turlar irəlilədikcə sonuncu pilləyə yuvarlanır.
Turun bəlkə də ən gözlənilməz nəticəsi Bayılda yaşandı. Avrokuboklara vəsiqəni hədəfləyən “Qəbələ” autsayder “Səbail”in qonağı idi. Çoxları “qırmızı-qaralar”ın çətinlik çəkmədən Bayıldan 3 xalla ayrılacağını ehtimal etsə də, Aftandil Hacıyevin komandası hamını yaxşı mənada təəccübləndirdi. Böyükhesablı qələbə ilə yanaşı, “dənizçilər” baxımlı oyunla da göz oxşadı. Son 13 matçda qələbəyə həsrət qalan, bunların 11-də meydanı məyus tərk edən “Səbail” qələbə sayəsində “Sumqayıt”a çatdı. Belə davam edəcəyi təqdirdə mövsümün sonunda bakılılar daha üst pillədə qərarlaşa bilər. “Qəbələ”nin enişi isə davam edir. Artıq “Sabah” bölgə təmsilçisindən cəmi 2 xal geri qalır. Bu isə o deməkdi ki, bizi qarşıdakı turlarda Konfrans Liqasına vəsiqə uğrunda maraqlı mübarizə gözləyir.
Azərbaycan premyer-liqası
4-cü dövrə, 22-ci tur
9 aprel
Şamaxı – Neftçi 1:2
Sabah – Zirə 3:1
10 aprel
Sumqayıt – Qarabağ 0:3
Səbail – Qəbələ 3:0
1. Qarabağ 21 16 4 1 49-11 52
2. Neftçi 22 12 5 5 37-25 41
3. Zirə 22 10 6 6 29-23 36
4. Qəbələ 22 9 7 6 31-30 34
5. Sabah 22 10 2 10 31-28 32
6. Şamaxı 22 5 5 12 24-33 20
7. Sumqayıt 21 3 5 13 12-35 14
8. Səbail 22 4 2 16 16-44 14
Bombardirlər: Volkov (Zirə) – 10, Mikels (Sabah) – 9, Ozobiç, Zubir (hər ikisi “Qarabağ”) – 8.
Növbəti turun oyunları: 15 aprel – Qarabağ – Şamaxı, Qəbələ - Sumqayıt; 16 aprel – Zirə - Səbail, Neftçi – Sabah.
RƏŞAD