"Bakıdakı oyunu və nəticəni unutmuşuq" - Elmar Baxşıyev
Konfrans Liqasının 2-ci təsnifat mərhələsinin cavab oyunlarında "Araz-Naxçıvan"ın “Aris”lə sabah baş tutacaq matçı öncəsi mətbuat konfansı keçirilib.
"Football-plus.az" xəbər verir ki, Naxçıvan təmsilçisinin baş məşqçisi Elmar Baxşıyev jurnalistlərin suallarını cavablandırıb.
O, oyunla bağlı öz fikirlərini bölüşüb:
“Birinci oyundan əvvəl də qeyd etdmişdik ki, şanslar bərabərdir. Bunu söz xatirinə demirdik, rəqibimizin yaxşı komanda olduğunu bilirdik. Buna görə Bakıdakı oyundan əvvəl şansların 50-nin 50-yə olduğunu demişdik. Bizi öz komandamız maraqlandırır. “Aris”in bərbad komanda olduğunu düşünmürəm. Sizdən fərqli olaraq biz meydanda həmin mübarizəni hiss edirdik. “Aris”ə hörmət edir, bir qədər çəkinirik".
Mütəxəssis qeyd edib ki, birinci oyunun nəticəsinə baxmırlar:
"Şans dediyiniz statistikadı, ona baxmırıq, oyunun taleyi meydanda həll olunur. Oyun ərzində komanda olaraq ən yaxşısını etməyə çalışacağıq. Birinci oyunu unutmuşuq. Sabahkı görüş haqda düşünürük. Komanda şəklində daha yaxşısını edə biləcəyimizə inanıram".
Baxşıyev bildirib ki, rəqibin necə oynayacağı haqda danışmaq istəmir:
"Çünki məni komandam, futbolçularımın nə edəcəyi maraqlandırır. “Aris”in güclü və zəif tərəflərini bilirik. Azarkeşlərə gəldikdə, bizim futbolçular da müxtəlif vaxtlarda bu cür fanat ordusu qarşısında oynayıblar. Ona görə ciddi təzyiq altına düşəcəklərinə inanmıram. Yenə deyirəm, Bakıdakı oyunu və nəticəni unutmuşuq. Hər şey sabahkı oyunda həll olunacaq. Biz də komanda olaraq bu görüşə köklənmişik".
Digər xəbərlər
