“Futbolçunun bu qədər dərinə getməsini düzgün saymıram” - Kamta şikayət etdi, irqçilik gündəm oldu
“Difai”nin futbolçusu Kristian Kamta 1-ci liqa oyunlarında irqçiliyə məruz qalmasıyla bağlı UEFA və FİFA-ya şikayət edib. Kamerunlu hücumçu aprelin 30-da Ombudsman Aparatına dəvət olunub.
Bu haqda aparatın mətbuat xidmətinin rəhbəri Araz Əsgərli məlumat verib. O bildirib ki, futbolçunun problemləri dinlənilib və araşdırma başlayıb:
“Futbolçunun müraciəti qeydə alınıb. Aidiyyətı tərəflərə də bununla bağlı tapşırıq verilib, rəsmi sorğular göndərilib. Futbolçuya da bundan sonra nə dəstək lazımdısa, göstərilib və göstəriləcək”.
Kamta özü də bu barədə açıqlama verib:
“Onlar məndən izahat aldılar. Əminəm ki, bu problem qısa müddət ərzində öz müsbət həllini tapacaq”.
Biz isə bu məsələ ilə bağlı “Difai”nin prezidenti Asəf Məlikovla əlaqə saxladıq:
“Nəsə etməyə ehtiyac yoxdu. Ombudsmanla yanaşı, AFFA da məsələni araşdırır. Mənim nəsə deməyim düzgün deyil. Nəsə olsa, məlumat veriləcək”.
Ümumiyyətlə, Azərbaycanda irqçilik varmı, futbolçunun dərisinin rənginə görə təzyiqə, ayrı-seçkiliyə məruz qalırmı? Ceyhun Sultanov bununla bağlı fikrini bölüşdü:
“Təkcə Azərbaycanda yox, bütün dünyada irqçiliyə məruz qalan futbolçular var. Düzdü, bu hal normal qarşılanmır. Hər bir azarkeşin şəxsi fikri var. Şikayət etməsi nə dərəcədə doğrudu - deyə bilmərəm. Futbolçusansa, bir qədər təmkinli olmalısan. Azarkeşlərin hamısı eyni psixologiyaya malik deyil. Futbolçunun bu qədər dərinə getməsini düzgün saymıram”.
MÜZƏFFƏR QULUZADƏ
Digər xəbərlər
