“Ötən ilin noyabr-dekabr aylarından AFFA-ya müraciət etmişik. Bildirmişik ki, burda işlər peşəkar səviyyədə təşkil olunub. Artıq komanda 1-ci divizionda çıxış edə bilər. Ötən mövsüm divizionda iştirak etmək üçün klubların qarşısına 11 tələb qoymuşdular. AFFA rəsmiləri ilə söhbətdə vurğuladıq ki, bunlardan onunu yerinə yetirə bilirik. Sadəcə, 3 il Region Liqasında çıxış etmək məsələsi bizdə alınmırdı. Artıq həmin tələb aradan qaldırılıb. Sağ olsun İcraiyyə Komitəsi ki, bu məsələni həll etdi. Amma bizə deyildi ki, divizionda çıxış edəcək kollektiv hansısa bölgəni təmsil etməlidi. Bundan əlavə, stadion problemi olmamalıdı. Bu səbəbdən də bir neçə rayonla danışıq aparırıq. Düşünürük ki, bu məsələ tezliklə həllini tapacaq. Təbii ki, Tərtər də bu siyahıdadı. Lakin hələ dəqiq nəsə yoxdu. Bildiyiniz kimi, Region Liqasında mübarizəni dayandırdıq. Paytaxt və Şimal Zonasının A və B qrupunun ikinciləri arasında keçirilən görüşdə “Şirvanovka”ya məğlub olduq. Bizə qarşı çox böyük haqsızlıq, ədalətsizlik oldu. Rəqibin heyətində “lipa” var idi. Bununla bağlı hakimə etiraz etdik. Lakin fayda vermədi. İntizam Komitəsinə müraciət etmişik. Əfsuslar olsun ki, onlar da bizi haqlı saymadılar. Yekunda AFFA Apellyasiya Arbitraj Tribunalına müraciət etdik. Qərarı gözləyirik. Lakin bir çox futbolçumuzla yolları ayırmışıq. Düşündük ki, onlar başqa klublarda növbəti mövsüm üçün təcrübə toplaya bilər. Bu səbəbdən də əsas heyətin bir çox üzvünü komandadan göndərmişik.
Maliyyə məsələsinə gəlincə, Region Liqasında iştirak etsək də, tələblər peşəkar səviyyədə idi. Maliyyə dəstəyi verəcək şirkətlərdən zəmanət məktubu tələb olunurdu. Biz onları təqdim etdik. Hazırda da həmin şirkətlərlə əməkdaşlığımız davam edir. Bir çoxları ilə danışıq aparırıq. Əsas dəstəkçimiz Əlil Arabasında Qılıncoynatma Federasiyasıdı. Onlar təkcə 2022-ci ildə 500-dən çox qaziyə dəstək olub. Paralimpiya hərəkatına dəstək məqsədi ilə bir çox işlər görüblər. “Globa” şirkəti də maliyyə dəstəyi verir. “Difai Servis” təhlükəsizlik şirkəti də dəstəkçilərimiz arasındadı. Bir sözlə, maliyyə baxımından sıxıntımız yoxdu. Ümid edirəm ki, 1-ci divizionda çıxış etsək, dəstəklərini yenə davam etdirəcəklər. Məqsədimiz 1-ci diviziona gələrək peşəkar olmaq deyil. İşlərimizi peşəkar səviyyədə quraraq aşağı dəstədə oynamaq fikrindəyik. Buna görə də divizionda çıxış etmək üçün AFFA-ya müraciət etmişik”.