Şamaxı düyünü: “Keşlə” də, PFL də yaxasını kənara çəkdi – RƏSMİ AÇIQLAMALAR
Ölkə futbolunda aləm dəyib bir-birinə dəyib. 2-3 gün öncə hamı bilirdi ki, martın 18-də “Keşlə” - “Sumqayıt” matçı Şamaxıda keçiriləcək.
Dünən isə PFL açıqladı ki, yox, belə deyil! Qarşılaşma “ASK Arena”da baş tutacaq.
Qısa müddət ərzində nə baş verdi ki, görüşün keçirilmə yeri dəyişmədi? Qəliz və anlaşılmaz məqam olduğu üçün hər iki tərəfə müraciət etdik. Həm “Keşlə”dən, həm də PFL-dən soruşduq ki, “Sumqayıt”la oyun nə üçün Şamaxıda keçirilmir? Sualı paytaxt təmsilçisinin mətbuat xidmətinin rəhbəri Səbuhi Məmmədov və PFL-in Texniki İdman Departamentinin direktoru Elgiz Abbasov cavabladı.
Səbuhi Məmmədov: “Şamaxıya köçmək barədə rəsmi açıqlama olmamışdı, növbəti turlarda gedəcəyik. Biz hamının fikrinə hörmətlə yanaşırıq. Amma yeni deyirəm, nə biz tərəfdən, nə də PFL-dən görüşün Şamaxıda keçiriləcəyi ilə bağlı hansısa rəsmi açıqlama verilib. Düzdü, başqaları müəyyən fikirlər söyləmişdilər. Amma rəsmi şəxslərdən kimsə nəsə deməmişdi. Bunun arxasında nəsə axtarmaq lazım deyil. Qarşıdakı turlarda Şamaxıya köç barədə məlumat verilməlidi. PFL-in verdiyi açıqlama da bu istiqamətdədi. Burda başqa nəsə axtarmağa lüzum yoxdu. Nə zaman rəsmən açıqlanacaq, onda da Şamaxıya köçəcəyik”.
Elgiz Abbasov:
"Dünən bu məsələ ilə bağlı suala Aslan Şahgəldiyev elə sizin qəzetinizə açıqlama verib. Bu gün dəyişən məqam yoxdu. PFL-in Mətbuat və İctimaiyyətlə Əlaqələr Departamentinin açıqlaması bizim ortaq fikilərimiz idi. Bu haqda yenidən danışmağa gərək yoxdu".
İLKİN SULTANLI
