“Hər kəsə məlumdu ki, “Ayaks” Avropanın köklü, sayılıb-seçilən klublarındandı. Heyət baxımından da, büdcə baxımından da “Qarabağ”dan üstündü. Reallıq budu. Mən özüm stadionda olsam da, sonradan qol epizoduna “yutub”da baxdım. Düzü, çox şübhəli gəldi. Adətən, epizodun VAR-dan təkrarı gələndə bu formada göstərmirlər. Həmişə ofsaydı başqa rakursdan verirlər. Amma bu dəfə xətlərlə çəkmişdilər. Görmüşük ki, oyunçuların siluetini göstərirlər. Bu dəfə o cür vermələri mənə çox qəribə gəldi. Oyuna baxanda görünürdü ki, ofsayd yox idi. Birinci məsələ bu idi. İkincisi, Romaonun “qırmızı” alması çox absurd idi. Çünkü peşəkar futbolçu topu saxlayırsa, kənara ötürür ki, birdən qapıçıya çatmaz. Yaxud da oyunçular ələ keçirə bilər. Bir səhvi topu özündə saxlamaqla, ikincini də oyunçunu yıxmaqla etdi. Bilmək olmazdı o top qapıya çatardı, rəqib qol vurardı, ya yox. Fikrimcə, hakimin “Ayaks”a simpatiyası vardı. “Qarabağ”ın əleyhinə, rəqibin lehinə qərarları çox oldu. Bəzən reallıqları qəbul etmək lazımdı. İştah diş altındadı, bizim tələbələrimiz də artır, amma istəklər reallıqla uzlaşmır”.