Dünya çempionatının Sinqapur mərhələsi “Ferrari”nin pilotu Karlos Saynsın qələbəsi ilə bitdi.

"Football-plus.az" xəbər verir ki, “Formula-1”də 2-ci qələbəsini qazanan ispaniyalı hiyləgər taktikaya əl atdı ki, bunun sayəsində son yarış mövsümün bəzəyinə çevrildi.

- Yarış cəlbedici idi, mübarizə sərt xarakter daşıyırdı – Sinqapurdakı qələbənin bu aspektlərindən hansı ilə daha çox qürur duyursuz?
- Birini seçmək çətindi. Düzünə qalsa, hər şeylə qürur duymaq olar. Bu il məhz Sinqapurda qalib gəlmək baxımından yeganə imkanımız oldu və biz də qazandıq. Həftəsonu boyunca bircə səhv də buraxmadıq, hərçənd təzyiqə dözməli olduğumuz məqamların sayı çox idi, ancaq biz sakitliyi qoruduq, planımıza, taktikamıza söykəndik. Bir çox amili nəzərə almaq lazım idi – təkərlərin deqradasiyası, pit-stoplar, DRS... Bütün bunlara nəzarət edə, yarışı qazana bildik. Bu isə heç də asan deyil.

- Həftəsonu boyunca əla sürət göstərdiz, ancaq yarış ərəfəsində uğurunuza nə dərəcədə əmin idiz?
- Yarışdan əvvəl proqnozlaşdırmaq çətin idi ki, qələbə qazanmaq üçün sürətimiz çatacaqmı? Ancaq məndə belə hiss var idi ki, hansısa şansım olacaq. Mənə elə gəlir ki, startda ilk pilləni qorumaq, ardından tempi artırmaq lazım idi. Plan məhz belə idi, ancaq təhlükəsizlik maşını trassa hədsiz erkən çıxdı. Artıq 20-ci dövrədə sərt təkərlərə keçmək niyyətim yox idi, trassda daha çox dayana biləcəyimi hiss edirdim. Sözsüz, yarışın sonuna yaxın pressinq hədsiz yüksək səviyyəyə çatmışdı.

- Son dövrələrdə əsəbləşmək lazım gəldi?
- Əvvəlcə bir o qədər əsəbləşmirdim. Ona görə ki, son 12-15 dövrədə də rəqiblərimə hücum edə biləcəyimi hiss edirdim. Ancaq mən əyləci basan kimi təkərlərin deqradasiyası prosesi daha da intensivləşdi. Düşünürəm ki, mənim maşınım da çox sürüşürdü, Lando Norrisin “Maklaren”i də. Bundan başqa, “Mersedes”in pilotlarının Şarl Lekleri sürətlə arxada qoyması, mənlə Norrisi haqlaması da məni çox təəccübləndirdi. Həmin anda düşündüm ki, qələbə asan başa gəlməyəcək, son 5-6 dövrdə əsl savaş gedəcək. Həmin məqamda taktikanı bir qədər dəyişməli oldum. Hiyləgərlik etmək lazım gəldi, Landoya DRS hesabına sürətlənmək imkanı yaratdım və bu da rəqiblərin qarşısını almağa imkan verdi.

- Lando ilə fərqi nəzarətdə saxlamağı, bununla yanaşı, onun zərbəsinə məruz qalmamağı necə bacardız?
- Bu həmişə çətindi. Axı özünü əlavə pressinq altında qoyursan. Bu vəziyyətdə anlayırsan ki, əyləc sisteminin bloklanmasına yol vermək olmaz, bir səhv də buraxa bilməzsən. Belədə Lando ötmək imkanı qazanacaq. Lando 16-17-ci dövrələrdə rəqib hücumlarının qarşısını alanda vəziyyət bir qədər də mürəkkəbləşdi. Bundan sonra mən bir qədər sürəti azaltdım ki, o, DRS sistemindən yararlana bilsin. Güman edirəm ki, məhz bu manevr qələbəmə yol açdı, eyni zamanda Landoya da 2-ci yeri qazandırdı. Belə olmasaydı, “Mersedes”in pilotları Landonu ötsəydi, mən də onların asan ovuna çevriləcəkdim. Belədə məni də asanlıqla arxada qoyacaqdılar.

- Montsada əla sürət göstərdiz, Sinqapurda isə gözəl qələbə qazandız. Bu kontekstdə qarşıdakı Suzuka yarışı ərəfəsində nə deyə bilərsiz?
- Düzünə qalsa, bütün bunlar heç nəyə təsir etmir. Ardıcıl iki həftəsonunu maşınımıza münasib olan trasslarda yaxşı keçirdik. Komandamızla qürur duyuram. Ona görə ki, mühəndislər maşınımızın Zandfort trassı ilə müqayiəsədə daha effektli çalışması üçün hədsiz çox əmək sərf etmişdi. Bununla belə, düşünürəm ki, irəlidə çətinlik çəkəcəyimiz çoxlu həftəsonu olacaq. Bəlkə də yenə fəxri kürsü uğrunda mübarizə aparacağıq, bəlkə də 5-ci və ya 6-cı yerlə kifayətlənməli olacağıq.

- Zandfortda və Montsada yaxşı çıxış etdiz, Sinqapurda isə qələbə qazandız. Bütün bunlar yay fasiləsindən sonra olub. Hiss edirsizmi ki, məhz yaydan sonra hər şey daha yaxşı alınmağa başlayıb?
- Bəli, mən artıq maşını daha yaxşı anlayıram, necə sürməli olduğumu hiss edirəm. Ancaq bu hiss yay fasiləsinə qədər də yaranmışdı. Sadəcə, mühəndislərlə bir araya gəldik və düşündük ki, bütün həftəsonu boyunca maksimal dərəcədə effektli və sabit çalışmaq üçün nə etmək olar. Aydındı ki, yaxşı temp göstərməyə qadirik, ancaq heç vaxt həftəsonları hər şeyi bir araya gətirə bilmirdik. Baxaq görək mövsümün bu mərhələsində nəyə nail olmaq mümkündü. Ancaq Zandfortdan başlayaraq işlər yaxşı gedir. Montsada hər şey, demək olar ki, ideal alındı, Sinqapurda isə sadəcə, ideal alındı. Belə işlə qürur duymaq olar. Bu üzdən mühəndislərimizə, mexaniklərimizə, ümumiyyətlə, bütün komandaya görə çox sevinirəm.

- “Ferrari” bu dəfə məhz sizə, qələbənizə güvəndi, yarışın ilk bölümündə hətta Şarl Lekler də fərq açmaqda yardım etdi. Əvvəllər belə olmurdu, hətta Montsada komanda yoldaşınızla da yarışırdız. Bu planda nə dəyişib? “Ferrari”ni yarışı qazana biləcəyinizə necə inandırdız?
- Açığını deyim ki, komandanın məhz mənə bel bağladığını düşünmürəm. Biz, sadəcə, hər iki maşın üçün maksimal mümkün nəticəyə nail olmağa çalışdıq. Şarl fərq yaratdı, həminin aramızda müəyyən interval saxladı ki, təhlükəsiz maşını trassa çıxanda problemlə üzləşməyək. Hər şey məhz belə oldu, razılaşırsız? Düzünü deyim ki, həftəsonu yaxşı temp göstərdim, maşınla bütünləşdiyimi hiss etdim, hər şeyə nəzarət edə bildim, “Medium” təkərlərində də çox sürətliydim. Sükan arxasında özümü çox rahat hiss edirdim. Hərçənd lider olmaq həmişə qarşıya qoyulan hədəfə çatmağı asanlaşdırır.