“Formula-1” üzrə dünya çempionatında mövsüm sona yaxınlaşmaqdadı.

Football-plus.az xəbər verir ki, növbəti mərhələ oktyabrın 2-də Sinqapurda keçiriləcək. Onsuz da qalibin kimliyi heç kimdə şübhə doğurmur. Qeyri-adi hadisə baş verməsə, “Red Bull”un pilotu Maks Ferstappen ardıcıl 2-ci çempionluğu bayram edəcək. “Haas”ın pilotu Kevin Maqnussen isə cari mövsümü o qədər də uğurlu keçirmir. 22 xalla şəxsi hesabda 12-ci pillədə qərarlaşan danimarkalı “Haas”ın mətbuat xidmətinə verdiyi müsahibədə Sinqapur mərhələsinin özəllikləri haqda danışıb.

- 2019-dan bəri ilk dəfə Sinqapura dönəcəyinizə görə sevinirsizmi?
- Həqiqətən də Sinqapur xoşuma gəlir. Ümumilikdə şəhər trasslarının vurğunuyam, Sinqapur isə ən yaxşı şəhər trasslarından biridi. Yarış fiziki baxımdan çətindi, bu üzdən trenajor zalında çox vaxt keçiririk, bu da formamızı yaxşılaşdırmaqla bağlı stimul verir.

- 2018-ci və 2019-cu illərdə Sinqapur mərhələsində ən sürətli dövrə sizə məxsus olub. Belə nəticə ilə qürur duyursuzmu?
- Həm 2018-də, həm də 2019-da yeni təkərlərin sayəsində həqiqətən də son dövrələrdə çox yaxşı nəticə göstərmişdim. Ancaq həmin yarışlarda xal qazana bilmədiyimizə görə düşünmürən ki, bunda qürurlanmaq üçün əsas var. İlk “10-luq”da yer alsaydım, daha çox qürur duyardım, ümid edirəm ki, bu il xal toplaya biləcəm.

- Sinqapura səfər ərəfəsində yarışlara standart hazırlıq planında nəyisə dəyişirsizmi?
- Bizi yalnız istilik və rütubət yox, həm də trassın konfiqurasiyası üzündən ən mürəkkəb yarışlardan biri gözləyir. Orda döngələr bir-birini əvəz edir, bu üzdən nəfəs dərməyə vaxt olmur. Trassların əksərində bir neçə düz yol olur, belə yerlərdə adam bir növ dincəlir. Ancaq Sinqapurda hətta düz sayılan yerlərdə də sükanla işləməyə məcbur olursan. Bundan başqa, trassda çoxlu qabarmalar var, bir an belə “boşalmaq” mümkün deyil. Hazırlıqla bağlı hansısa spesifik yanaşmam yoxdu. Artıq dediyim kimi, var qüvvəmlə məşq edirəm. Sinqapur mərhələsinin çox çətin olacağını tez-tez özümə xatırlatmaqla trenajor zalında motivasiya qazanıram.

- Sinqapurda gecə qrafiki üzrə çalışmaq sizə necəsə təsir edirmi?
- Avropa saat qurşağı əsasında yaşamağa çalışırıq ki, belədə vəziyyət çətin olur, çünki gec yatmalı oluruq. Digər tərəfdən, bu bizə yardım edir, başqa saat qurşağına öyrəşmək lazım gəlmir. Sinqapur mərhələsindən dərhal sonra Yaponiyaya yollanacağıq. Orda artıq başqa vaxta uyğunlaşmalı olacağıq.