“Kəpəz” yeni mövsümə uğurlu başladı.

Gəncəlilər Misli premyer-liqasının ilk turunda evdə əzəli rəqibi “Neftçi”yə qalib gəldi – 1:0. Bu qələbə “sarı-göylər”in tərəfdarlarını həvəsləndirib. Ötən mövsüm elitanı tərk etməməyə görə sevinən bəzi azarkeşlər indi sevimli komandasını daha yüksək pillələrdə görmək istəyir. Reallıq odu ki, klubun nə heyəti, nə də büdcəsi arzulanan səviyyədə deyil. Tarixi zəfər isə xeyli futbol mütəxəssisi tərəfindən möcüzə kimi qiymətləndirilir. İndi “Kəpəz”i çox çətin mövsüm gözləyir. Həmçinin Gəncə təmsilçisi bu gün “Zirə” ilə gücünü sınayacaq.

Qeyd olunan və başqa məqamlar ilə bağlı azarkeşlərin marağını nəzərə alıb, “Kəpəz”in baş məşqçisi Azər Məmmədovla söhbət etdik. O, bir çox məsələyə aydınlıq gətirdi.

- “Sarı-göylər” evdə “ağ-qaralar”a güc gəldi. Müzakirələr həm mətbuatda, həm də sosial şəbəkələrdə hələ də davam edir. Kimisi deyir ki, bu mövsüm “Kəpəz”in geridönüşüdü, kimisi də qələbəni bəxtlə əlaqələndirir...
- Komandanın əziyyətinə kölgə salmaq düzgün olmaz. Oyunu izləyən hər kəs bilir ki, son dəqiqəyə qədər “vuruşduq”. Gəncəlilər üçün qələbə gözlənilməz deyildi. Yaxşı hazırlaşmışdıq. Futbolçular tapşırıqlarıma xarakter və əzmkarlıqlarını əlavə edib mübarizə apardılar. Bəxtə gəlincə, əlbəttə, bunun da rolu var. O mənada ki, performansımıza təsir edəcək hansısa bədbəxt hadisə yaşana bilərdi. Şükür Allaha, hər şey xoşbəxt sonluqla bitdi.

- Baş məşqçi kimi premyer-liqada debüt etdiz. İlk matçda məhz ölkənin flaqmanını məğlub etmək necə hissdi?
- Maraqlıdı... (gülür). Hər baş məşqçi istəyər ki, komandası meydandan qalib ayrılsın. Büdcəsi bizimkindən qat-qat artıq, futbolçuları istənilən cəhətdən daha üstün olan “Neftçi”ni məğlub etmək, təbii ki, xoş oldu. Digər tərəfdən “Kəpəz” də ilk 3 xalını qazandı. Zəfərin futbolçularda yaratdığı psixoloji vəziyyət də qiymətsizdi. Ümumiyyətlə, mövsümün ilk matçı digər bir neçə oyun üçün təməl rolu oynadığından sınaqdan üzüağ çıxmaq daha vacib amildi.

- Komandadan gözləntiləri artan azarkeşlər var. Deyirlər ki, ilk “5-lik” pis olmaz...
- Gəncənin futbol tarixi çoxuna bəllidi. “Kəpəz” çempion olmağa layiq komandadı. Əlimizdəki büdcə ilə, sadəcə, premyer-liqada qalmaq üçün çalışa bilərik. Təbii ki, qarşıda uzun mövsüm, cürbəcür macəralar bizi gözləyir. Bilmək olmaz, bəlkə daha yuxarı pillələrdə qərarlaşdıq. Elə nüanslar var ki, bilavasitə bizdən asılı deyil. Mən hələ büdcə çatışmazlığı üzündən komandamı arzuladığım kimi komplektləşdirə bilməmişəm. Xəyalımdakı gücə çatmaq üçün xeyli çatışmazlıq var. Həll edilib-edilməməsi isə sual altındadı.

- Sözlərinizdən hazırki futbolçulardan narazı olduğunuzu düşünə bilərik? Hansı çatışmazlıqlardan söhbət gedir?
- Əsla. Komandamdan razıyam. Əslində “Kəpəz” elə klubdu ki, imkanlar bundan pis olsa belə, uğur qazanmağa məcbursan. Şərəfli adı qorumaq üçün istənilən heyətlə yaxşı oyun göstərib qələbə qazanmalısan. Çatışmazlıqlara gəlincə, daha yaxşısı həmişə var. Mən xüsusilə hücumçu axtarışındayam. Ümumiyyətlə, sağ və sol cinahlarda da boşluqlar hiss olunur. Legionerlərlə birlikdə daha 5-6 futbolçu transfer etmək istəyirəm. Məhdud büdcə ilə ürəyincə olan oyunçu tapmaq çox çətindi. Gözləyirəm ki, yerli klublar futbolçularını icarəyə versin. Bu baş versə, ağlımda olanları dərhal heyətə cəlb etməyə çalışacam. Əcnəbilərlə iş isə dalana dirənib. Qane edən üçün büdcə uyğun deyil, uyğun olan qane etmir. Amma bunun bizə maneə olmasını istəmirəm. Axtarış sahəmi genişləndirmişəm ki, bəlkə hardasa hərtərəfli qane edəcək oyunçu tapım.

- “Neftçi” üzərindəki inamlı qələbədən sonra komandaya mükafat verildiyini eşitdik...
- Əslində hələ verilməyib. Amma qələbə qazandığımız üçün idarə heyətinin sədri İlqar Nadiri böyük məbləğdə vəsait vəd edib. Sizin vasitənizlə ona təşəkkür edirəm. Büdcəmizin az olmasına baxmayaraq, komandaya daim diqqət yetirilməsi xoşagələn haldı. Hətta mükafat klubun maddi gücü ilə nisbətdə daha çoxdu.

- Qarşıda “Zirə” ilə matç var. Qəsəbə təmsilçisi son çempion “Qarabağ”ı məğlub etdi. Qaliblərin duelindən gözləntiləriniz necədi?
- “Zirə” çox güclüdü. Formalaşmış heyəti, yaxşı büdcəsi var. Rəşad bəy yaxşı komanda qurub. Çətin olacaq. Amma heç yerdə görünməyib ki, rəqib güclüdü deyə “Kəpəz” təslim olsun. Son ana qədər inamı itirmədən mübarizə aparacağıq. Oyuna ciddi hazırlaşırıq. Futbolçularım da istədiyim səviyyəyə çatmaq üzrədi. Məncə, baxımlı oyun olacaq. Qorxaq oynamayacağıq.

KƏNAN BAHADIR