“Altınordu” oyunçu yetişdirib xaricə göndərmək strategiyasını davam etdirir.

"Football-plus.az" xəbər verir ki, dünya futboluna Cengiz Ündər və Çağlar Söyüncü kimi ulduzları bəxş edən İzmir təmsilçisi son iki mövsümdə Burak İncə, Əmrə Destan və Yiğit Əmrə Çeltik kimi oyunçuları Avropaya göndərmişdi.

Onların sırasına daha bir futbolçu qoşulub. Söhbət Əmircan Gürlükdən gedir. Son dönəmlərdə 19 yaşlı vingerin Rusiyanın dəyişməz çempionu “Zenit”ə keçməyə yaxın olduğu iddia edilirdi. Daha doğrusu, piterlilərin onu transfer edərək başqa kluba icarəyə verəcəyi gözlənilirdi. İstedadlı futbolçu həqiqətən də karyerasını Rusiyada davam etdirəcək. Amma “Zenit”də yox, “Orenburq”da. Gürlük Rusiya premyer-liqasında çıxış edən bu klubla üçillik müqavilə imzalayıb. Maliyyə detalları rəsmi şəkildə açıqlanmasa da, Rusiya mətbuatında bu transferin “Orenburq”a 1,5 milyon avroya başa gəldiyi iddia edilib. Əmircan Gürlük “Qalatasaray”ın yetirməsidi və 2019-a qədər İstanbul nəhənginin akademiyasında top qovub. Daha sonra “Altınordu”na yollanıb. O, 2021-dən bəri əsas komandaya cəlb olunmağa başlayıb. Geridə qoyduğumuz mövsüm 1-ci liqada çıxış edən “Altınordu” üçün uğurlu alınmadı. Bu klub 2-ci liqaya yuvarlandı.

Gürlük son iki mövsümdə izmirlilərin heyətində 29-u ilk “11-lik”də olmaqla 60 rəsmi oyuna çıxaraq 6 qol, 4 məhsuldar ötürməlik performans sərgiləyib.