Mövsümü ilk “dördlük”də tamamlamasa da, məlum səbəbdən Konfrans Liqasında oynamaq hüququ qazanan “Zirə” ümidləri artıqlamasıyla doğrultdu. “Qartallar” Gürcüstanın zəngin avrokubok təcrübəsinə malik olan komandalarından birini – “Torpedo”nu hər iki oyunda 3:0 hesabıyla darmadağın edərək növbəti mərhələyə vəsiqə qazandı.

Təbii ki, bu uğura görə Rəşad Sadıqovun komandasına alqış düşür. “Zirə” kasad heyətinə rəğmən, təkcə 6 qol vurmadı, həm də qapısını toxunulmaz saxladı. Bizi narahat edən məqam isə “Zirə”nin çətin keçəcəyi gözlənilən Kutaisi səfərində azarkeş dəstəyi görməməsidi. Azı ona görə ki, cavab oyunundan əvvəl “Torpedo”nun “doğma divarlar” arasında mərhələ adlayacağını düşünənlər belə var idi.

“Qartallar”ın mətbuat xidmətinin rəhbəri Elmar Abdullazadənin “Football-plus.az”a verdiyi məlumata görə, komandanı stadiondan yalnız ölkəmizin Gürcüstandakı səfirliyinin bir neçə əməkdaşı və ailə üzvləri dəstəkləyib. Cəmi 10 nəfər! Halbuki qonşu ölkədə xeyli azərbaycanlı məskunlaşıb. Gürcüstan Milli Statistika Xidmətinin ötən ay açıqladığı statistikaya əsasən, burda gürcülərdən sonra ən böyük etnik azlıq azərbaycanlılardı. Onlar ölkənin ümumi əhalisinin nə az, nə çox - 6,8 faizini təşkil edir.

Kəsəsi, qonşu ölkədə hazırda 269 min azərbaycanlı yaşayır. Tbilisi ilə Kutaisi arasında məsafənin marşrutdan asılı olaraq 210-230 kilometr aralığında dəyişdiyini, yəni avtomobillə səfərin təxminən 3-4 saat vaxt alacağını nəzərə alsaq, “Zirə”ni dəstəkləmək üçün stadiona yollanmaq çətin olmamalıydı. Təəssüf ki, soydaşlarımız komandamızı səfərdə tək qoydu...

KƏNAN BAHADIR