''Fənərbaxça'' bir tərəfdən Jorje Jezuşun başçılığı altında yeni mövsümə hazırlığı davam etdirirsə, digər tərəfdən heyətini də gücləndirməklə məşğuldu.

Artıq braziliyalı Linkoln Enrike və portuqaliyalı Armindo Brumanı transfer edən İstanbul nəhəngi bu yay 3-cü keçidini də rəsmiləşdirib. Söhbət Əmrə Mordan gedir. Klubdan verilən rəsmi açıqlamada həm futbolçunun özü, həm də onun şərəfini qoruduğu ''Fatih Karagümrük''lə anlaşma əldə olunduğu qeyd olunub. Əmrə Mor Türkiyə futboluna maraq göstərənlərə çox gözəl tanışdı. Danimarkada doğulan və ''Norşellan''nın yetirməsi olan bu futbolçunun istedadı çox erkən yaşda kəşf olundu. Fatih Terim onu yığmanın heyətində AÇ-2016-ya da aparmışdı. Elə həmin il Əmrə 19 yaşında 10 milyon avroya Dortmund ''Borussiya''sına keçmişdi. Amma necə deyərlər, əli pula çatan kimi dəbdəbəli həyata həvəs göstərməsi və peşəkarlıqdan uzaq həyat sürməsi üzündən Morun inkişafı dayanmışdı. Elə 13 milyon avroya transfer olunduğu ''Selta''da da o ümidləri doğrulda bilməmişdi. Amma gələn ay 25 yaşı tamam olacaq futbolçu geridə qoyduğumuz mövsümdə ''Fatih Karagümrük''ün heyətində yenidən oyunu ilə diqqət çəkməyi bacardı. 29 rəsmi oyunda 6 qol, 4 məhsuldar ötürmə ilə yadda qalan Mora mövsüm bitən kimi ''Torino'' və ''Fiorentina'' başda olmaqla bir çox önəmli klub maraq göstərdi. Amma ''Fənərbaxça'' hamıdan cəld tərpənərək istedadlı futbolçunu transfer etdi. Halbuki ötən yay Əmrə nəinki superliqa, heç 1-ci liqa təmsilçilərinə də lazım deyildi. ''Fatih Karagümrük''ün prezidenti Süleyman Hurma onun istedadına güvənərək komandasına dəvət etdi və yanılmadı. Hurma bir neçə gün öncə verdiyi açıqlamada bildirmişdi ki, Əmrəni satdıqdan sonra hətta 15 milyon avroya da onun kimi özəlliklərə malik futbolçu tapa bilməyəcək.

Transferin detallarına gəlincə, ''Fənər''in qarşı tərəfə 2 milyon avro və bonuslar ödəyəcəyi gözlənilir. Futbolçu ilə ''2+1''illik müqavilə imzalanacaq. Onun illik məvacibi 1 milyon 250 min avroya bərabər olacaq. Maraqlı məqam odu ki, ''Fənər''in bu yay transfer etdiyi 3 futbolçudan ikisi daha öncə ''Qalatasaray''ın şərəfini qoruyub! Belə ki, həm Bruma, həm də Əmrə Mor ''Cim-Bom''un sabiq üzvüdü. Terim 2020-nın yayında Moru icarə əsasında ''Qalatasaray''a transfer edərək onun istedadını aça biləcəyini düşünmüşdü. Amma bu futbolçu ''Qalatasaray''da ümidləri doğrultmamış və həmin mövsümün ikinci dövrəsini icarə əsasında ''Olimpiakos''da keçirmişdi. Bruma və Əmrə ilə birlikdə tarixdə həm ''Qalatasaray''ın, həm də ''Fənərbaxça''nın şərəfini qorumuş futbolçuların sayı 27-yə çatdı.