Çağlar Söyüncünün yeni klubunun adına böyük ölçüdə aydınlıq gəlib.

Football-plus.az xəbər verir ki, qeyri-adi nəsə baş verməsə, istedadlı müdafiəçi karyerasını “Atletiko”da davam etdirəcək.

Bilindiyi kimi, 26 yaşlı futbolçunun bu mövsüm “Lester”də işləri düz getmir. Daha doğrusu, baş məşqçi Brendan Rocers onu bilərəkdən ehtiyatda “çürüdür”! Səbəb isə odu ki, Çağlar klubla yeni müqavilə imzalamaq istəmir. Onun “tülkülər”lə müqaviləsinin müddəti mövsümün sonunda başa çatacaq. Türkiyə yığmasının üzvü cari “futbol ili”ndə 1-i premyer-liqada və 1-i Liqa kubokunda olmaqla “Lester”in heyətində cəmi 2 rəsmi oyuna çıxıb. Bu arada İspaniyanın “Marka” nəşrinin yazdığına inansaq, Çağlar artıq bu qış, yəni müqavilə müddəti başa çatmadan Madridə yollana bilər.

Bilindiyi kimi, qaydalara görə o, yanvardan etibarən istədiyi klubla danışıq aparmaq hüququna malikdi. Söyüncüyə “İnter”in, eləcə də “Fənərbaxça” və “Qalatasaray”ın da maraq göstərdiyi deyilirdi. Xüsusilə “Fənər” onu ikinci dövrədə 6 aylığa icarəyə götürmək üçün canfəşanlıq edirdi. Amma Çağlar birmənalı şəkildə vətəninə qayıtmaq istəmədi. “İnter”in marağı isə elə maraq səviyyəsində də qaldı. Yəni Çağlar üçün necə deyərlər, bütün yollar Madridə gedib çıxır. İspanların iddiasına görə “Atletiko” cüzi kompensasiya ödəyərək qışda Çağları transfer edə bilər. Amma bu, daha çox iki mərkəz müdafiəçisi – Felipe ilə Ermosodan heç olmasa, birinin qışda “Atletiko”nu tərk edəcəyi halda baş verəcək. Onlar komandada qalsalar, Çağlar Madridə yayda, yəni azad agent statusunda yollanacaq.

“Hindular” yaxın keçmişdə artıq müqavilə müddəti bitmək üzrə olan oyunçunu yanvarda transfer etmək təcrübəsi yaşayıblar. Söhbət Reynildo Mandavadan gedir. Paytaxt təmsilçisi ötən mövsümün qış fasiləsində “Lill”ə 3 milyon avro ödəyərək onu transfer etmişdi. Çağlara gəlincə, 2018-in yayında 21 milyon avroya “Frayburq”dan “Lester”ə keçən müdafiəçi İngiltərə karyerasında 125 rəsmi oyuna 3 qol vurub və 2 titul qazanıb. Ötən ilin yayında onun dəyəri 45 milyon avro idisə, indi bu məbləğ 22 milyon avroya bərabərdi.