İbrahimoviç: “Öz-özümə dedim ki, hətta gedişimə Tanrı da məyusdu”
Zlatan İbrahimoviç çoxdan gözlənilən qərarı verib.
"Football-plus.az" xəbər verir ki, o, peşəkar futbolçu karyerasına 41 yaşında son qoymağı lazım bilib.
“Milan” rəhbərliyi artıq sona çatan mövsümdə zədə üzündən İtaliya çempionatında yalnız 4 dəfə meydana çıxan və 1 qol vuran hücumçu ilə müqaviləni yeniləməmək qərarına gəlmişdi. Görünür, bunu nəzərə alan isveçli futbolçu yayda başqa kluba keçməyi zəruri saymayıb. “Verona” ilə oyundan (3:1) sonra onun şərəfinə mərasim keçirilib. Zlatan tədbirdə “artıq “vidalaşaq” deməyin məqamı gəlib. Futbolla vidalaşmağın məqamı yetişib” deməklə uzunmüddətli və titullarla zəngin futbolçu həyatına son qoyduğunu bəyan edib. Azarkeşlərin vida nitqindən sonra onu gurultulu alqışlara qərq etməsindən çox təsirlənən İbrahimoviç göz yaşlarını saxlaya bilməyib.
Matçdan sonra keçirilən mətbuat konfransında bir çox məqamlara toxunmaq şansı olan hücumçu qərarını belə izah edib:
“Sabahdan sərbəst adam olacağam. Sabah həyatımın yeni mərhələsi başlayacaq. Belə uzunmüddətli karyeraya malik olmağımla fəxr edirəm. Bu səhər yuxudan ayılanda yağış yağırdı. Öz-özümə dedim ki, hətta gedişimə Tanrı da məyusdu. Qərarı on gün əvvəl vermişdim. Bu qərarı hətta sonuncu dəfə meydana çıxmaq şansımın olmadığını bilərək qəbul etmişdim (o, sonuncu dəfə rəsmi oyunda mart ayında çıxış edib – red.). Bu gün yaşadığım anlar çox gözəl idi, həmin anları həyatım boyunca unutmayacağam. Bundan sonra maşınım Milanelloya (klubun bazası – red.) mənsiz gedəcək. Başqa marşrutlar axtarmalı olacağıq...”
Dünya şöhrətli futbolçu karyerasını başa vurandan sonrakı həyatı ilə bağlı sualı belə cavablayıb:
“Mənim gələcəyim? İndi, sadəcə, hazırkı andan məmnunluq hissi keçirmək istəyirəm. Növbəti qərarımı verməyə tələsməyəcəm, hər şey haqqında ətraflı düşünməliyəm. Hər yanın sakitləşəcəyi məqamı gözləyəcəyəm. İndi emosiyaların ağuşundayam... Futbolu birdəfəlik tərk edəcəyimi düşünmürəm. Baxarıq, görək bu sahədə hansı rolda qalacağam”.
Digər xəbərlər
