"AFFA İcraiyyə Komitəsinə və qurumun rəhbərliyinə müraciət etmişdik. Növbəti il dövlət tərəfindən ayrılacaq büdcənin xərclənmə istiqamətlərinin müəyyənləşdirilməsi ilə bağlı bütün məsələlər müzakirə olundu. Görüşdə iştirak etdiyi üçün Klublar Komitəsi adından milli assosiasiyanın prezidenti Rövnəq Abdullayevə təşəkkür edirəm. Bizi dinlədi və öz fikirlərini bildirdi. Verdiyimiz təkliflərin nəzərə alınacağına söz verdi. Hətta bəzilərinin yerindəcə bizim istəyimizə uyğun nizamlanması üçün də göstəriş verdi. Klublara ayrılan vəsaitin legioner futbolçulara xərclənməməsi təklifi irəli sürülürdü. Qərar qəbul olunmasa da, müzakirə mövzusu idi. Ötən il hansısa klub xarici komandalara futbolçu transfer etsəydi, 150 min manat qazanırdı. Əks halda həmin vəsait ona ayrılan məbləğdən kəsilirdi. Belə meyar mövcud idi. Həmin meyarı isə iki klubdan başqa heç biri yerinə yetirməmişdi. Əslində qərar natamam idi. Boşluqlar da həddən artıq idi. Rövnəq müəllim bizimlə razılaşdı. Məbləğin hansısa şəkildə klublara geri qaytarılacağı bildirildi”.

“Söhbət klubun yetirməsindən gedir. Hansısa klubun yetirməsi xaricə yollanacağı halda AFFA tərəfindən 150 manat ödənilməsi nəzərədə tutulub. “Turan Tovuz”, “Kəpəz” kimi klublar özləri futbolçu axtardığı halda hansı transferdən söhbət gedə bilər? İclasda bu məsələ müzakirə olundu və qərara alındı ki, ödəniş, klublara stimul başqa formada olsun. Deyildi ki, klubların yetirmələri yığmalara cəlb olunacağı halda onlara ödəniş olunacaq. Burda söhbət U-17-dən başlayaraq, daha yuxarı yaş qruplarından gedir. Fariz müəllim AFFA prezidentinin də iştirak etdiyi görüşdə klubları narahat edən məsələlər bardə çox yaxşı çıxış etdi. Rövnəq Abdullayev də qabardılan məsələlərin nəzərə alınacağını bildirdi”.

“Klubların nəzdində qızlardan ibarət komandalara illik 100 min manat ayrılması nəzərdə tutulub. Ümumi fikir belə oldu ki, qadın futboluna ayrılan bu vəsait həddən artıq çoxdu. Ora ayrılan maliyyəni bir qədər aşağı salıb uşaq futboluna yönəltmək daha məqsədəuyğun olar. Şişirdilmiş rəqəmlər heç kimə lazım deyil. Onsuz da ayrılan vəsaitə nəzarət var, yalandan heç kim heç kimi aldatmaq istəmir. Bu heç düzgün də olmaz. Bizdə qadın futbolunun səviyyəsi hamıya məlumdu. Uşaq futboluna diqqəti artırmaq, daha yüksək səviyyədə iş görmək gələcək adına çox fayda verə bilər”.