“Apreldə A kateqoriyalı məşqçi lisenziyasını alandan sonra baş məşqçi kimi fəaliyyət göstərmək fikrim var idi. Eyni zamanda, “Şamaxı” və “Kəpəz”də köməkçi məşqçi kimi davam etmək variantını da nəzərdən keçirirdim. Lakin müəyyən müzakirələrdən sonra razılıq əldə olunmadı. Mənim üçün bir neçə variant var idi. 1-ci liqadan təkliflər almışdım. Bu seçimlər içərisində ən uyğun olanı “Zaqatala” oldu. Klubun meneceri Toğrul Əsgərov mənə bu postu təklif edəndə ilk növbədə onların strategiyası ilə tanış oldum və bu məni müsbət mənada təəccübləndirdi.

Zaqatala Azərbaycan futbolunda köklü ənənələri olan bir şəhərdi, futbol mühiti ilə seçilir. Bu bölgədən Musa Qurbanov, Qurban Qurbanov, Şaban Şirdanov, İlkin Qırtımov kimi futbolçular yetişib. Hazırda da premyer-liqada Zaqataladan olan bir çox futbolçu var. Bu baxımdan ora əsl futbol şəhəridi.

Klubun strategiyası mənə çox uyğun gəldi. Büdcə də bu strategiyaya uyğun şəkildə formalaşdırılıb. Əsas diqqət gənc futbolçulara yönəlib, yalnız 2-3 təcrübəli oyunçudan istifadə olunacaq. Futbolçuların qalması, qidalanması və maaşı yaşlarına uyğun şəkildə təmin olunur. Sabah Zaqatalaya yollanıram və komanda ilə ilk toplantımız olacaq. Orda həm mövcud, həm də keçmiş oyunçularla bağlı qərarlar veriləcək. Bu barədə daha dəqiq məlumatı yaxın günlərdə bölüşəcəyik.

Qarşıya qoyulan əsas məqsəd üç il ərzində elitaya yüksəlməkdi. Bu hədəfə əsasən gənc və perspektivli futbolçular hesabına çatmaq planlaşdırılır. Ümid edirəm ki, bu məqsədə nail ola biləcəyik”.