Misli premyer-liqasının sonuna yaxınlaşdıqca intriqa pik həddə çatır. Son pillərlərdə yer alan kollektivlərdə gərginlik o qədər yüksəkdi ki, nə etdiklərini bilmirlər. Söhbət təkcə futbolçulardan və ya məşqçilərdən getmir.

Deyəsən, “Səbail”in son pillədə qərarlaşması kluba psixoloji baxımdan çox təsir edir. “Gəmiçilər” ölüm-dirim mübarizəsini məcazi yox, hərfi qəbul edir. Klubun rəsmi “feysbuk” hesabındakı son paylaşım da dediklərimi təsdiqləyir. Bakı klubunun sosail şəbəkə hesabında Misli premyer-liqasının 33-cü turunda keçiriləcək “Sumqayıt”la səfər oyunun posteri paylaşılıb. Hazırlanan multimedia insanlara aqressiyanı aşılayır. Mərkəzdə yer alan Mirabdulla Abbasovu əli silahlı şəxslər nişan alıb. Fotonun üzərində ingilis dilində “Don’t set him off” cümləsi həkk olunub. Bunun 2 mənası var: “Onu söndürmə” və “Onu güllələmə”.

Peşəkar klub nə üçün aqressiyanı təbliğ etsin? Düzdü, yuxarıda qeyd etdiyim kimi, “Səbail” “Sumqayıt” səfərində ölüm-dirim mübarizəsinə çıxacaq. Amma bu məcazi mənadadı. Həmin fikri vizual olaraq insanlara ötürməyin nə mənası var? Yaxşı, burda Mirabdullanın günahı nədi? Silahlar ona niyə hədəflənməlidi? “Səbail”in “Sumqayıt”la mübarizəsinin taleyi ancaq forvarddan asılıdı?

Onsuz da son zamanlar ölkə gündəminin əsas mövzusu idmandakı şiddətdi. Belə məqamda bu posterə nə gərək var? “Səbail”in Marketinq Departamenti RTM etmək istəyib? Bu fikir klubun imicinə daha da pis təsir edir. Onsuz da Azərbaycanda “gəmiçilər”i klub olaraq sevməyənlər çoxdu. Premyer-liqadan düşməsini, hətta dağılmasını səbirsizliklə gözləyənlər var. Nə üçün klubu belə şeylərlə içindən məhv edirsiz? Bunun üçün şərait yaradırsız.

Ümid edirəm ki, klub tezliklə bu biabırçılığa son qoyacaq. Həmin post silinəcək və günahkar cəzalanacaq. Nə üçün günahkar? Çünki posterdə şiddət təbliğ edilir və Azərbaycan dili təhqir olunur. Yəqin ki, hələ də “Səbail”in Marketinq Departamentinin əməkdaşları dərk etmir ki, klub Azərbaycana bağlıdı. İdarəçilik, sistem avropasayağı ola bilər, hətta burda çalışanlar azərbaycanlı olduqlarını da inkar edə bilər. Lakin “Səbail” bizim klubdu. Kimlərinsə müasirlik, iş adı ilə Azərbaycana məxsus kollektivin şiddəti təbliğ etməsinə imkan vermərik!

Məsələ ilə bağlı qarı tərəfin fikirlərini işıqlandırmağa hazırıq.

İLKİN SULTANLI